Toshkent shahrida Shveysariya kompaniyasi bilan hamkorlikda 2017-yilda ishga tushirilgan kuzatuv kameralarining litsenziyasi tugadi. Bu haqda Toshkent shahar hokimligi huzuridagi Raqamli rivojlanish departamenti rahbari o‘rinbosari Aleksey Xen ma’lum qildi.
Aleksey Xenning so‘zlariga ko‘ra, poytaxtning 114 ta chorrahasi va boshqa obyektlariga o‘rnatilgan kuzatuv kameralarining litsenziyasi tugagani sabab ular qayta ishlashi uchun endilikda mahalliy Abl-soft kompaniyasi tomonidan ishlab chiqilgan dasturdan foydalanish ko‘zda tutilmoqda.
“Mazkur kompaniya o‘z yechimini 2017-yili O‘zbekiston Prezidentining Mirzo Ulug‘bek innovatsion markaziga tashrifi davomida taqdim etgandi. Ular tezlikni va raqamlarni aniqlaydigan AutoCon radarlar tizimini yaratgan bo‘lib, hozirda u butun respublikaga joriy etilmoqda”, — deydi Raqamli rivojlanish departamenti rahbari o‘rinbosari.
Taklifga ko‘ra, 1,1 milliard so‘mga mazkur tizim xarid qilinadi. Amaldorning aytishicha, bu pulni ikki oyda qoplash mumkin bo‘ladi. Chunki bitta kompleks oyiga taxminan 300 million so‘mlik qoidabuzarlikni qayd etadi.
Izoh (0)