Oksford universiteti olimlari koronavirus oqibatida yuzaga keladigan o‘limlar sonini qanday qilib 75 foizga kamaytirish mumkinligini aniqladi

Aholining eng zaif guruhini himoya qilgan holda COVID-19 natijasida yuzaga keladigan o‘lim darajasini 75 foizga qisqartirish mumkin, bu guruh umumiy aholi sonining 5 foizini tashkil qiladi. 8 milliondan ortiq bemorning ma’lumotlarini tahlil qilgan Oksford universiteti olimlari ana shunday xulosaga keldi, deb yozmoqda “Korrespondent.net”.

Aniqlanishicha, pandemiyaning birinchi to‘lqini vaqtida o‘lim holatlarining 75 foizi xavf guruhiga kiruvchi odamlarda kuzatilgan.

“Bu model odamlar COVID-19’dan himoyaning tegishli choralariga amal qilishi uchun klinik tavsiyalarni ishlab chiqishga imkon beradi”, — deya ma’lum qilgan professor Juliya Xipisli-Koks.

Bunda maqsadli blokirovka qilish masalasi pandemiya e’lon qilingan mart oyidan boshlab muhokama qilingan.

“Agar xavf guruhidagi 5 foiz odamga o‘limlarning 75 foizi to‘g‘ri kelsa, bu ishonib bo‘lmaydigan natija. Bu biz uchun xavf guruhidagi odamlarni oldindan aniqlay olishimiz mumkinligini anglatadi. Bu odamlarning kasallanish xavfi qolgan 95 foiz aholiga qaraganda 50 marta yuqori. Agar bu 5 foizni himoya qilish usuli topilsa, masalan, yaqin aloqadagi kishilarni doimiy testdan o‘tkazish orqali bu natija maqsadli blokirovka konsepsiyasini tasdiqlaydi. Bu esa sog‘liqni saqlash tizimining ishini sezilarli darajada yengillashtiradi”, — deya ta’kidlagan Edinburg universiteti yuqumli kasalliklar epidemiologiyasi professori Mark Vulxaus.