Markaziy bank boshqaruvining 22-oktabr kuni o‘tkazilgan yig‘ilishida bank raisi Mamarizo Nurmurodov O‘zbekiston bozorlarida go‘sht va boshqa oziq-ovqat mahsulotlari narxi davlat tomonidan tartibga solinishi holatlari kuzatilganiga munosabat bildirdi.
Kadr: UzReport
“Bu masalada men shuni qayd etishim kerakki, o‘zbekchasiga aytganda, mahalliy hokimiyat organlarining bu kabi harakatlariga nisbatan ‘Sallasini olib kelgin desa, kallasini olib keladi’, degan bir tushuncha bor. Biz bu kabi choralarga qarshimiz. Bu masalada Prezident bizdan, eng avvalo, narxlarni ma’muriy tartibga solish hisobidan emas, taklif va talab hisobiga barqarorlashtirish kerakligini talab qiladi”, — degan Markaziy bank raisi.
Eslatib o‘tamiz, 16-oktabr kuni Shavkat Mirziyoyev 16-oktabr kuni oziq-ovqat xavfsizligini ta’minlash va ichki bozorda narx-navo barqarorligini saqlash chora-tadbirlari yuzasidan videoselektor yig‘ilishi o‘tkazgandi. Unda go‘sht, tuxum, o‘simlik yog‘i va shakar narxining keskin o‘sishi aholining noroziligiga sabab bo‘layotgani ta’kidlangan edi.
Shuningdek, barcha oziq-ovqat mahsulotlarining zaxirasi bo‘lishi kerakligini, bu davlat siyosatiga aylanishi lozimligini aytgandi. Shundan so‘ng Toshkent shahrida go‘sht narxiga cheklov o‘rnatilgani ma’lum bo‘ldi.
