“O‘zbekiston 24” telekanalining jonli tarzda Toshkent shahridagi dehqon bozorlarida sotilayotgan go‘shtlarga bag‘ishlangan ko‘rsatuvida poytaxt aholisidan biri go‘shtga katta suyaklar qo‘shib berilayotganini ma’lum qildi.

Kadr: Telegram

Yunusobod dehqon bozoridan tayyorlangan reportaj vaqtida boshlovchi qassobdan bugun qancha go‘sht sotgani haqida so‘ragan. Bu vaqtda xaridorlardan biri jurnalistning yoniga yaqinlashib, bor haqiqatni “oshkor qilib qo‘ygan”.

“Menga qaranglar, televizorga olyapsizlar, to‘g‘risini olinglar. Mana bu go‘shtning o‘zini sotmaydi-ku… Mana bunday suyak qo‘shib beryapti”, — deydi mijoz qo‘llari bilan ishora qilgan holda.

Avvalroq O‘zbekistonning qaysi bozorlarida eng arzon go‘sht sotilayotgani ma’lum qilingan edi.

Eslatib o‘tamiz, Shavkat Mirziyoyev raisligida 16-oktabr kuni oziq-ovqat xavfsizligini ta’minlash va ichki bozorda narx-navo barqarorligini saqlash chora-tadbirlari yuzasidan videoselektor yig‘ilishi o‘tkazildi. Unda go‘sht, tuxum, o‘simlik yog‘i va shakar narxining keskin o‘sishi aholining noroziligiga sabab bo‘layotgani ta’kidlandi. Prezident barcha oziq-ovqat mahsulotlarining zaxirasi bo‘lishi kerakligini, bu davlat siyosatiga aylanishi lozimligini ta’kidladi. Shundan so‘ng Toshkent shahrida go‘sht narxiga cheklov o‘rnatilgani ma’lum bo‘ldi.