Oliy Majlis Senatining sakkizinchi yalpi majlisida senator Qutbiddin Burhonov Toshkent shahrining Farg‘ona yo‘li ko‘chasida olib borilayotgan ta’mirlash ishlari haqida tanqidiy fikr bildirgan. Senat vakili ta’mirlash tufayli kunning tig‘iz paytida harakatlanayotgan transport vositalari shahar markazidan Qo‘yliq mavzesiga yetib borguncha 1,5-2 soatcha vaqt yo‘qotayotgani natijasida fuqarolarning haqli e’tirozi kuchayayotganini ta’kidlagan.

Qutbiddin Burhonov

Foto: Senat matbuot xizmati

“Nima uchun kunning tig‘iz payti ta’mirlash ishlari olib borilayotgan ko‘chalarda yo‘l harakati xavfsizligi xodimlari tirbandlikning oldini olish bo‘yicha o‘z xizmat vazifalarini olib bormaydi?”— deydi Burhonov.

Bundan tashqari, Senatning Mudofaa va xavfsizlik masalalari qo‘mitasi raisi poytaxtda ko‘chalar nomini aks ettiruvchi yo‘l ko‘rsatkichlarini o‘rnatish ishlari sust olib borilayotgani, natijada nafaqat Toshkentga kelayotgan mehmonlar, balki o‘ziga kerakli ko‘chalarni topishda shahar aholisi ham turli qiyinchiliklarga duch kelayotganini aytdi.

Transport vazirligi huzuridagi Avtomobil yo‘llar qo‘mitasi raisining birinchi o‘rinbosari Shuhrat Nazarov ushbu savolga javob berib o‘tgan.

“Bu nafaqat Toshkent shahri, balki viloyat markazlarining ham muammosi. Muammo ustida hokimliklar bilan ishlanayotgani, chunki hokimliklar qoshidagi qurilish-montaj boshqarmalari Ichki ishlar vazirligi qoshida bo‘lgan. Hozirda hokimliklar bilan ularni qayta jihozlash ishlarini amalga oshiryapmiz. Ularni yakunlaganimizda yo‘l belgilari va yo‘l chiziqlarini o‘z vaqtida o‘rnatish tashkil etiladi”, — deydi Nazarov.

Eslatib o‘tamiz, avvalroq Toshkent shahar hokimligi Farg‘ona yo‘li ko‘chasida olib borilayotgan yo‘l ta’mirlash ishlarini tezlashtirish maqsadida 20-oktabr soat 00:00 dan 8-noyabrga qadar Farg‘ona yo‘li ko‘chasidan Uysozlar ko‘chasiga (Panelniy mavzesi) o‘tish va qaytish (yo‘lning har ikki qatnov qismi) yopiq bo‘lishini ma’lum qilgan edi. Hokimlik vujudga kelishi mumkin bo‘lgan tirbandliklarning oldini olish uchun haydovchilarga aylanma yo‘llardan foydalanishni tavsiya etgan.