Олий Мажлис Сенатининг саккизинчи ялпи мажлисида сенатор Қутбиддин Бурҳонов Тошкент шаҳрининг Фарғона йўли кўчасида олиб борилаётган таъмирлаш ишлари ҳақида танқидий фикр билдирган. Сенат вакили таъмирлаш туфайли куннинг тиғиз пайтида ҳаракатланаётган транспорт воситалари шаҳар марказидан Қўйлиқ мавзесига етиб боргунча 1,5-2 соатча вақт йўқотаётгани натижасида фуқароларнинг ҳақли эътирози кучаяётганини таъкидлаган.
«Нима учун куннинг тиғиз пайти таъмирлаш ишлари олиб борилаётган кўчаларда йўл ҳаракати хавфсизлиги ходимлари тирбандликнинг олдини олиш бўйича ўз хизмат вазифаларини олиб бормайди?»— дейди Бурҳонов.
Бундан ташқари, Сенатнинг Мудофаа ва хавфсизлик масалалари қўмитаси раиси пойтахтда кўчалар номини акс эттирувчи йўл кўрсаткичларини ўрнатиш ишлари суст олиб борилаётгани, натижада нафақат Тошкентга келаётган меҳмонлар, балки ўзига керакли кўчаларни топишда шаҳар аҳолиси ҳам турли қийинчиликларга дуч келаётганини айтди.
Транспорт вазирлиги ҳузуридаги Автомобиль йўллар қўмитаси раисининг биринчи ўринбосари Шуҳрат Назаров ушбу саволга жавоб бериб ўтган.
«Бу нафақат Тошкент шаҳри, балки вилоят марказларининг ҳам муаммоси. Муаммо устида ҳокимликлар билан ишланаётгани, чунки ҳокимликлар қошидаги қурилиш-монтаж бошқармалари Ички ишлар вазирлиги қошида бўлган. Ҳозирда ҳокимликлар билан уларни қайта жиҳозлаш ишларини амалга оширяпмиз. Уларни якунлаганимизда йўл белгилари ва йўл чизиқларини ўз вақтида ўрнатиш ташкил этилади», — дейди Назаров.
Эслатиб ўтамиз, аввалроқ Тошкент шаҳар ҳокимлиги Фарғона йўли кўчасида олиб борилаётган йўл таъмирлаш ишларини тезлаштириш мақсадида 20 октябрь соат 00:00 дан 8 ноябрга қадар Фарғона йўли кўчасидан Уйсозлар кўчасига (Панелний мавзеси) ўтиш ва қайтиш (йўлнинг ҳар икки қатнов қисми) ёпиқ бўлишини маълум қилган эди. Ҳокимлик вужудга келиши мумкин бўлган тирбандликларнинг олдини олиш учун ҳайдовчиларга айланма йўллардан фойдаланишни тавсия этган.
Изоҳ (0)