Namangan viloyati Davlat soliq boshqarmasi ijtimoiy tarmoqlarda “Paxta solig‘i: Tadbirkorlardan 6 million so‘mgacha pul yig‘ilmoqda” sarlavhasi ostida tarqalgan xabarlarga munosabat bildirdi.
Foto: UzTag
Ijtimoiy tarmoqlarda tarqalgan xabarlarda namanganlik tadbirkorlar tomonidan paxta terimi uchun 5-6 million so‘mdan pul yig‘ilayotgani va ularga nisbatan bosim o‘tkazilayotgani qayd etilgan. Ta’kidlanishicha, bu ishlar IIB va viloyat soliq idoralari xodimlari tomonidan amalga oshirilmoqda.
Masalaga aniqlik kiritish maqsadida viloyat davlat soliq boshqarmasi shuni ma’lum qiladiki, 2020-yilgi paxta mavsumi uchun hech qanday tadbirkordan pul talab qilinmagan, aksincha yurtimizda tadbirkorlikni rivojlantirishga qaratilgan siyosatga javoban viloyatda ishbilarmonlik muhitini kuchaytirish hamda tadbirkorlarning biznesini rivojlantirishda o‘z amaliy yordamini berib kelmoqda. Xususan, 2020-yil avvalida birgina Namangan viloyatida 22 mingta yuridik maqomidagi tadbirkorlik subyekti faoliyat olib borgan bo‘lsa, qo‘llab-quvvatlashlar natijasida o‘tgan 9 oy davomida ular soni 25 mingtaga yetdi.
2020-yilning 1-iyulidan boshlab ilk marotaba tadbirkorlarga qo‘shilgan qiymat solig‘ining bir qismini qaytarish mexanizmi amalga kiritildi. Ularga xizmat ko‘rsatish 1-sentabrdan boshlab, hududiy soliq boshqarmalariga o‘tkazildi. Bu esa tadbirkorlik subyektlarining ortiqcha ovoragarchiliklariga barham bermoqda. O‘tgan davr mobaynida tadbirkorlik subyektlaridan kelib tushgan jami 124 ta arizaga asosan 38 milliard 800 million so‘m pul mablag‘lari tadbirkorlarga qaytarildi.
Viloyat DSB hamda uning hududiy inspeksiyalariga jami 5208 ta yuridik shaxslardan tushgan murojaatlar vakolat doirasida ijobiy hal etilgan. Xulosa qilib aytganda, bugun soliq idoralari xodimlari tadbirkorlarga ko‘makchi sifatida o‘z vazifalarini olib borishmoqda.
Ijtimoiy tarmoqdagi xabarda paxta shtabining ikki nafar a’zosi hamda viloyat IIB, viloyat DSB xodimlari tomonidan bu yolg‘on xabar ekanligi tasdiqlangan.
Eslatib o‘tamiz, yolg‘on ma’lumot berganligi uchun O‘zbekiston Ma’muriy javobgarlik to‘g‘risidagi kodeksiga asosan javobgarlik belgilangan.
Namangan viloyati Davlat soliq boshqarmasi axborot xizmati
Avvalroq Namanganda bank xodimlari majburiy paxta terimiga jalb qilingani, shuningdek, Toshkent viloyatida “Chinni bozor”dagi tadbirkorlarga paxta terimi uchun 1,5 million so‘mdan “soliq solingani” to‘g‘risida xabarlar tarqalgandi. Keyinroq Zangiota tumani hokimligi ushbu xabarlarni rad etib chiqqandi.
