Futbol bo‘yicha Angliya Premyer Ligasining 5-turida “Tottenhem” 18-oktabr, yakshanba kuni “Vets Hem”ni qabul qildi.
Foto: Twitter
Uchrashuvning ilk daqiqasidayoq “shporlar” hisobni ochdi. Harri Keynning uzatmasidan keyin qulay vaziyatga chiqib borgan Son Hyon Min imkoniyatni ko‘kka sovurmadi.
Oradan ko‘p vaqt o‘tmay Keyn o‘z hisobiga gol yozdirib qo‘ydi, unga uzatmani koreyalik futbolchi amalga oshirib berdi. 16-daqiqada hisob yirik ko‘rinish oldi: Serxio Regilonning qanotdan uzatgan to‘pini Harri boshi bilan darvozaga joylab qo‘ydi.
Ikkinchi bo‘limni mezbonlar o‘z nazorati ushlab turgandek edi, biroq so‘nggi o‘n daqiqalikda omad “Vest Hem” tomonida bo‘ldi. 82-daqiqada Fabian Balbuena hisobni qisqartirgan bo‘lsa, oradan uch daqiqa o‘tib Davinson Sanches o‘z darvozasini ishg‘ol qilib qo‘ydi. Hakam tomonidan qo‘shib berilgan vaqtning so‘nggi daqiqasida Manuel Lansini o‘zining super zarbasi bilan to‘qqizlik burchakni aniq nishonga oldi va muvozanatni tikladi.
Mazkur uchrashuvda Garet Beyl qaytganidan keyingi debyutini o‘tkazdi. Uelslik futbolchi 72-daqiqada zaxiradan maydonga tushdi. Hisob 3:2 bo‘lib turgan vaqtda Beyl o‘yinga mantiqiy nuqtani qo‘yishi mumkin edi, biroq futbolchi darvozabon bilan birga-bir vaziyatda noaniq zarba berdi.
“Tottenhem” 8 ochko bilan 6-o‘rinda bormoqda, “Vest Hem” (7) esa 8-pog‘onaga ko‘tarildi.
APL
5-tur bahslari
18-oktabr, yakshanba
“Tottenhem” — “Vest Hem” 3:3
Gollar: 1:0 – 1 Son Hyon Min, 2:0 – 8 Keyn, 3:0 – 16 Keyn, 3:1 – 82 Balbuena, 3:2 – 85, avtogol Sanches, 3:3 – 90+4 Lansini.
“Tottenhem”: Lyoris, Alderveyreld, Regilon, Sanches, Orye, Sissoko, Ndombele (Uinks, 73), Bergveyn (Beyl, 72), Hyoyberg, Son Hyon Min (Lukas Moura, 80), Keyn.
“Vest Hem”: Fabianski, Ogbonna, Masuaku (Snodgrass, 90), Balbuena, Soufal, Rays, Souchek, Bouen, Fornals (Lansini, 77), Kressuell, Antonio (Yarmolenko, 77).
Ogohlantirishlar: Antonio (20), Ogbonna (72), Souchek (77), Masuaku (89), Lansini (90).
“Sheffild Yunayted” — “Fulhem” 1:1
Gollar: 0:1 – 77 Lukman, 1:1 – 85, penalti Sharp.
“Kristal Pelas” — “Brayton” 1:1
Gollar: 1:0 – 19, penalti Zaha, 1:1 – 90 Mak Allister.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
