Berlinda koronavirus bilan bog‘liq vaziyat sababli karantin cheklovlari kuchaytirildi

Berlin Senati koronavirusga chalingan bemorlarning ko‘payishi fonida karantin cheklovlarni kuchaytirishga qaror qildi. Bu haqda Berliner Morgenpost’ga tayanib “RBK” xabar bermoqda.

Hokimiyat qarorida tunda do‘konlar, barlar, restoranlar va klublarni yopish, shuningdek, xususiy tadbirlarga tashrif buyuruvchilar sonini cheklash ko‘zda tutilgan.

Do‘konlar, barlar, restoranlar va klublarda tungi komendantlik soati 23:00 dan 06:00 gacha bo‘ladi.

Yopiq joydagi shaxsiy bayramlarda qatnashish uchun cheklovlar mavjud. Ularga tashrif buyuruvchilar soni 25 dan 10 taga kamaytirildi. Shu bilan birga, soat 23:00 dan 06:00 gacha besh kishidan ko‘p bo‘lmagan guruhlar ochiq havoda yig‘ilishiga ruxsat beriladi.

Yangi chora-tadbirlar 10-oktabr soat 00:00 dan kuchga kiradi va 31-oktabrgacha amal qiladi.

Ma’lum qilinishicha, Germaniyadagi shifokorlar avgust oyining boshlarida mamlakatda koronavirusning ikkinchi to‘lqini boshlanganini e’lon qildi. Nemis shifokorlari assotsiatsiyasi raisi Syuzanna Yona ta’kidlashicha, Germaniyada virus tarqalishining takroriy va bir maromda o‘sishi kuzatilmoqda. Shu bilan birga, u keyinchalik kasallanganlar soni bo‘yicha ikkinchi to‘lqinni mart va aprel oylari ko‘rsatkichlari bilan taqqoslash mumkin emasligini ta’kidladi.

Nemis shifokorlari assotsiatsiyasi raisi, Germaniya klinikalari koronavirusning ikkinchi to‘lqini uchun tayyor, deb ishontirdi.

Jon Hopkins universitetining 7-oktabrdagi ma’lumotlariga ko‘ra, Germaniyada 303 mingdan ortiq COVID-19 bilan kasallanish holati qayd etilgan. Kasallik oqibatida 9546 kishi vafot etgan.

Eslatib o‘tamiz, Kanada, Chexiya, Avstriya va Gruziyada ham koronavirusning ikkinchi to‘lqini boshlangani haqida xabar berilgan edi. Buyuk Britaniyada COVID-19 bilan bog‘liq vaziyat bahordagi ko‘rsatkichga qaytmoqda. Bir oydan beri turistlar uchun ochiq bo‘lgan Turkiyada koronavirus tarqalishi yana avj oldi. Isroil esa “germetik” karantin joriy qildi.