Namangan viloyati Yangiqo‘rg‘on tumanidagi ko‘p qavatli uyda olib borilayotgan ta’mirlash ishlari chog‘ida yollanma ishchi elektr toki urishi oqibatida halok bo‘ldi. Bu haqda Namangan viloyati IIB axborot xizmati xabar berdi.
Ma’lum qilinishicha, 2020-yil 25-sentabr kuni Yangiqo‘rg‘on tumanidagi “Vodiy” MFY Ipakchi ko‘chasida ta’mirlash ishlari olib borilayotgan ko‘p qavatli uyda baxtsiz hodisa yuz bergan. Texnika xavfsizligi yoki mehnatni muhofaza qilish qoidalariga rioya etilishi yetarli darajada tashkil etilmaganligi oqibatida obyektda yollanma ishchi sifatida ishlayotgan Uychi tumanida yashovchi 1995-yilda tug‘ilgan fuqaroni elektr toki urgan, fuqaro voqea joyida vafot etgan.
Aniqlanishicha, marhumda elektr travma, organizmning umumiy aspeksiyasi, o‘ng qo‘l chap kafti uchi yuzasida elektr tamg‘a ko‘rinishidagi jarohatlar kuzatilgan va ular fuqaroning o‘limiga olib kelgan.
Ushbu holat bo‘yicha Yangiqo‘rg‘on tuman IIB huzuridagi Tergov bo‘limi tomonidan tergovga qadar surishtiruv harakatlari olib borilmoqda.
