Yevropa Ittifoqi O‘zbekistonda COVID-19’ga qarshi olib borilayotgan tezkor va samarali kurashni qo‘llab-quvvatlashga qaratilgan loyiha bo‘yicha 2 million yevrodan ortiq mablag‘ ajratdi. Bu haqda Yevropa Ittifoqining respublikadagi vakolatxonasi xabar berdi.
Xabarda aytilishicha, JSSTning mamlakatdagi vakolatxonasi tomonidan amalga oshirilayotgan loyiha birinchi navbatda tibbiyot muassasalarida bemorlar bilan bevosita aloqada bo‘lgan tibbiyot xodimlarini shaxsiy himoya vositalari bilan ta’minlashga qaratilgan.
Bugungi kunda O‘zbekistonda COVID-19 holatlarini aniqlash, tekshirish, tartiblash va davolash bilan bog‘liq ishlarda deyarli barcha shaxsiy himoya vositalaridan foydalaniladi. Bu esa COVID-19 tashxisi qo‘yilganligi taxmin qilingan yoki tasdiqlangan bemorlar toifasiga kirmaydigan bemorlar bilan ish olib boradigan tibbiyot xodimlari, masalan, tug‘ruqxonalarda, sil va OIV bilan kasallanganlar klinikalarda, stomatologiya, poliklinikalar va boshqalarda himoya vositalarisiz qolmoqda. Shuning uchun JSST tavsiya etgan shaxsiy himoya vositalarini nafaqat COVID-19 bemorlari bilan muomala qiladigan tibbiyot xodimlari uchun, balki boshqa sog‘liqni saqlash xizmatlari va muassasalari xodimlari uchun ham sotib olish COVID-19 tarqalishini kamaytirishda muhim ahamiyat kasb etadi.
“Tibbiy xodimlar har kunimizning qahramonlaridir, ular bizni himoya qilayotganda ular xavfsiz ishlay olishiga amin bo‘lishimiz shart. Ushbu loyiha O‘zbekistonga Yevropa hamjamiyati tomonidan pandemiyaga qarshi choralar doirasida ajratilgan 36 million yevro yordamning asosiy qismini o‘zida mujassam etadi”, — degan Yevropa Ittifoqining O‘zbekistondagi Muvaqqat ishlar vakili Yussi Narvi.
“Xarid qilingan sifatli shaxsiy himoya vositalari mamlakatdagi barcha tibbiy xodimlarga yetkazish uchun yetarlicha bo‘lib, bu tibbiy xodimlar orasida kasallik tarqalishi tufayli yana yo‘qotishlar ro‘y berishining oldini olishga va aholi orasida COVID-19 holatlarini kamaytirishga xizmat qiladi”, — deb ta’kidlagan JSSTning O‘zbekistondagi vakolatxonasi rahbari Lianne Kuppens.
Vakolatxonaning ta’kidlashicha, ushbu loyiha kelgusi ikki yil ichida mamlakat sog‘liqni saqlash xodimlari uchun yetarli miqdordagi yuqori sifatli shaxsiy himoya vositalarini sotib olish orqali infeksiyalar profilaktikasi va infeksion nazorat choralarini mustahkamlaydi.
Izoh (0)