Armaniston bosh vaziri jahon hamjamiyatidan Turkiyaning Qorabog‘ ishiga aralashuviga yo‘l qo‘ymaslikni so‘radi

Armaniston bosh vaziri Nikol Pashinyanning fikricha, jahon hamjamiyati Turkiyaning Qorabog‘ ishiga aralashishiga yo‘l qo‘ymasligi kerak. U bu haqda Tog‘li Qorabog‘ hududida vaziyat chigallashgani sababli mamlakat xalqiga yo‘llagan murojaatida ma’lum qilgan.

“Biz Janubiy Kavkazdagi katta urush yoqasida turibmiz, buning oqibatida juda ayanchli hodisalar yuz berishi mumkin. Urush hudud chegaralaridan chiqishi va keng miqyosdagi harbiy harakatlarga aylanishi hech gap emas. Jahon hamjamiyatidan barcha kuchlarni safarbar etgan holda Turkiyaning mazkur mojaroga aralashmasligini ta’minlashni so‘rayman”, — deya Armaniston hukumat rahbarining so‘zlaridan iqtibos keltirgan “TASS”.

Armaniston va Ozarbayjon o‘rtasidagi Tog‘li Qorabog‘dagi nizo 27-sentabrda yana yuz berdi. Ikkala tomon ham harbiy harakatlarni boshlab yuborgan va bir-birini provokatsiyada, chegaralarni buzib, hujum uyushtirganlikda ayblamoqda.

Vaziyat chigallashayotgan pallada Ozarbayjon prezidenti Ilhom Aliyev Turkiya davlat rahbari Rajab Toyyib Erdo‘g‘on bilan telefonda muzokaralar olib borgan va unda Anqara zarurat tug‘ilganda Bokuga yordam berishga tayyorligini ma’lum qilgandi.

O‘nlab kishilar halok bo‘lgan Armaniston va Ozarbayjon chegarasida avvalgi qurolli to‘qnashuvlar iyul oyi o‘rtalarida yuz bergandi. Shundan so‘ng armanlar va ozarbayjonlar o‘rtasidagi to‘qnashuvlar ikki mamlakatdan tashqarida, xususan, Moskvada sodir bo‘la boshladi.

So‘nggi 30 yildan buyon Armaniston va Ozarbayjon o‘rtasidagi munosabatlar Tog‘li Qorabog‘ hududi sabab yomonlashgan. Mintaqa Ozarbayjon hududida joylashgan bo‘lsa-da, 1991-yilda uning tarkibidan chiqqan. Tan olinmagan ushbu respublika hududida asosan armanlar istiqomat qilib keladi. Ikki mamlakat o‘rtasidagi chegarada muntazam qurolli to‘qnashuvlar sodir bo‘lib turadi.