Ukraina Sog‘liqni saqlash vazirligi koronavirus bilan bog‘liq epidemiologik vaziyatdan kelib chiqib, 25-sentabr holatiga ko‘ra “qizil” va “yashil” mamlakatlar ro‘yxatini yangiladi. Bu haqda “Korrespondent.net” xabar berdi.
Ro‘yxatda Jahon sog‘liqni saqlash tashkilotiga a’zo bo‘lgan 194 ta davlat bo‘yicha ma’lumotlar berilgan. Unda COVID-19 bilan kasallanish bo‘yicha har bir mamlakatda 100 ming kishiga to‘g‘ri keladigan faol holatlar haqida ma’lumot berilgan.
Ukrainada 19-sentabr holatiga ko‘ra, bu ko‘rsatkich har 100 ming aholiga 109,5 ta kasallanish holatini tashkil qilgan.
“Qizil” davlatlar qatoridan 25-sentabr holatiga ko‘ra 35 ta mamlakat o‘rin olgan, jumladan, Isroil, Ispaniya, Chernogoriya, Fransiya, Chexiya, Moldova, Vengriya.
“Yashil” mamlakatlar qatoriga esa Ruminiya, Albaniya, Belarus, Polsha, Turkiya, Gretsiya, Misr va boshqa davlatlar kiritilgan. O‘zbekiston ham “yashil” davlatlar qatoridan o‘rin olgan. Ro‘yxatda O‘zbekiston har 100 ming aholiga to‘g‘ri kelayotgan 25,8 ta holat bilan Bolgariya va Polsha orasida joylashgan.
Yana 15 ta davlat bo‘yicha COVID-19 bilan kasallanish holatlari haqida ma’lumot mavjud emas.
Avvalroq Ukraina prezidenti Vladimir Zelenskiy mamlakatda COVID-19 koronavirus infeksiyasi bilan kasallanishning ikkinchi to‘lqini ketayotganini ma’lum qilgandi.
Izoh (0)