AQSh milliy futbol ligasi (NFL) o‘tgan yakshanba kungi o‘yinlarda tibbiy niqob taqmaganligi uchun uch klub va ularning murabbiylarini jarimaga tortdi, deb xabar bermoqda Komonews.
Foto: Reuters
Xabarga ko‘ra, “Sietl Sihoks” ustozi Pit Kerroll “Nyu-Ingland Patriots” bilan o‘yinda niqob taqmagani uchun 100 ming dollar jarimaga tortilgan. Bundan tashqari uning klubi ham 250 ming dollar miqdorida jarima to‘laydi. Shuningdek, “San-Fransisko Forti Nayners” va “Denver Bronkos” bosh murabbiylari Kayl Shenaxen hamda Vik Fanxio klublari bilan birgalikda yuqorida qayd etilgan miqdorda jarima to‘lashi kerak bo‘ladi.
Ta’kidlanishicha, liga faqat uch murabbiyga jarima solish bilan cheklanmaydi, tez orada yana bir qancha protokolga amal qilmaganlar jazolanishi kutilmoqda. Qayd etish joiz, bir hafta oldin NFL vitse-prezidenti Troy Vinsent klublarga murabbiylar shtabi o‘yinlar vaqtida tibbiy niqobda bo‘lishi kerakligini va amaldagi xavfsizlik protokollariga rioya qilmaslik tegishli sanksiyalarga olib kelishini aytgan.
Milliy futbol ligasi (NFL) — amerikancha futbolning Qo‘shma Shtatlardagi professional birinchiligi hisoblanadi. Hozirda NFL tarkibida 32 ta jamoa bor. Liga 1922-yilda hozirgi nomini olgan. NFL’ning joriy mavsumi 10-sentabr kuni boshlangan va 2021-yil 3-yanvarida o‘z nihoyasiga yetadi.
Ma’lumot uchun, O‘zbekistonda karantinli va inson uchun xavfli bo‘lgan boshqa yuqumli kasalliklar paydo bo‘lishi hamda tarqalishi sharoitida vakolatli organning maxsus talablariga zid ravishda jamoat joylarida niqobsiz bo‘lish bazaviy hisoblash miqdorining besh baravarigacha (23-sentabr holatiga ko‘ra, 1 115 000 so‘m) miqdorda jarima solishga sabab bo‘ladi.
So‘nggi ma’lumotlarga ko‘ra, O‘zbekistonda o‘tgan 6 oy davomida 620 mingga yaqin fuqaro karantin qoidalarini buzgani aniqlangan. Shulardan 100 561 nafar fuqaroga nisbatan Ma’muriy javobgarlik kodeksining 54-moddasi 1-qismi (karantin sharoitida jamoat joylarida niqobsiz bo‘lish) bilan chora ko‘rilgan.
Mavzuga doir:
- To‘yini Tashkent City’da o‘tkazgan Vohidjon Isoqovga 4,5 mln so‘m jarima yozildi. “Avvalgi jarima” noto‘g‘ri bo‘lib chiqdi
- Toshkentda karantin payti xo‘roz urishtirgan bir guruh fuqaro jarimaga tortildi
- Gulistonda karantin vaqti bemaqsad velosiped haydab yurgan fuqaro jarimaga tortildi
- O‘zbekistonda 6 oy davomida 620 mingga yaqin fuqaro karantin qoidalarini buzgani aniqlandi
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
