Dunyodagi rivojlangan 13 ta davlat aholisi AQSh prezidenti Donald Trampdan ko‘ra ko‘proq Rossiya prezidenti Vladimir Putinga ishonadi. Bu Pew Research mustaqil tadqiqot markazi tomonidan o‘tkazilgan so‘rov natijalarida ma’lum bo‘ldi.

Foto: “TASS”

Tadqiqot Buyuk Britaniya, Fransiya, Germaniya, Kanada, Belgiya, Niderlandiya, Italiya, Ispaniya, Shvetsiya, Daniya, Yaponiya, Janubiy Koreya va Avstraliyada o‘tkazilgan. Uning ishtirokchilariga dunyoning olti nafar yetakchisi — Donald Tramp, Vladimir Putin, Fransiya prezidenti Emmanuel Makron, Germaniya kansleri Angela Merkel, Britaniya bosh vaziri Boris Jonson va Xitoy raisi Si Szinpinga bo‘lgan ishonch to‘g‘risida savol berilgan.

Sotsiologlarning aniqlashicha, ushbu mamlakatlarda istiqomat qiluvchilar ko‘proq Merkelga ishonadi. Bu haqda so‘rov ishtirokchilarining 76 foizi ma’lum qilgan. Ikkinchi o‘rinda Makron (64 foiz) joylashgan bo‘lsa, uchinchi pog‘onani Jonson (48 foiz) band etgan.

Vladimir Putinga respondentlarning 23 foizi, Si Szinpinga 19 foizi, Trampga esa 16 foizi ishonch bildirgan.

Rossiya prezidentiga Italiya (37 foiz) va Germaniya (31 foiz) aholisi ko‘proq ishonch bildirgani aytilmoqda. AQSh prezidenti esa ko‘proq Yaponiya aholisining ishonchini qozongan — 25 foiz.

So‘rov natijalariga ko‘ra, Buyuk Britaniyada so‘nggi 20 yil ichida AQShga bo‘lgan ishonch 40 foizdan ortiqqa tushib ketgan. 2000-yilda AQShga nisbatan britaniyaliklarning 83 foizi ijobiy munosabatda bo‘lgan bo‘lsa, endilikda ularning soni — 41 foizni tashkil etmoqda.