Польша президенти Лех Качиньскийнинг ўлимига олиб келган Ту-154М самолётининг фалокатига доир навбатдаги тергов комиссияси Россияда самолётни таъмирлаш вақтида унинг ичига тротил солиб қўйилгани маълум қилинган фильмни намойиш этди, деб хабар беради Polsat News.
Смоленскда фалокатга учраган Ту-154Мнинг тергови бўйича биринчи Польша комиссияси фалокатга самолётнинг қуюқ туман сабаб рухсат этилган минимум баландликдан пастда учганини сабаб қилиб кўрсатган эди. Бироқ 2012 йилда Польша ОАВ воқеа жойида топилган портловчи моддалар ҳақида ёза бошлаган.
«Фожиа Ту-154Мни капитал таъмирлаш ишлари вақтида қасддан амалга оширилган ҳаркатлар натижасида юзага келганига шубҳа йўқ… Польша президенти ва ҳукумат делегациясининг ўлимига олиб келган авария ва портлашга самолётнинг аэропортга қўнишига минг метр қолганда россиялик диспетчерлар томонидан қасддан нотўғри йўналиш кўрсатилгани сабаб бўлган», — дейилади комиссия ҳисоботида.
«Польша радиоси»нинг маълум қилишича, самолёт бортида икки бор портлаш рўй берган – чап қанот соҳасида ва самолётнинг марказий бўлмасида. Самолёт парчаларида мутахассислар тротил, гексоген ва пентрит изларини топган. Портлаш факти самолётнинг бузилиш характери, парчаларнинг сочилиши, шунингдек, ҳалок бўлганларнинг жароҳатлари билан тасдиқланади.
Шунингдек, Польша самолётининг қулаши сабабларини ўрганган россиялик терговчилар бортда содир бўлган портлашни яширишга уринганликда айбланган.
Сеймдаги (Польша қуйи палатаси) комиссия раиси, собиқ мудофаа вазири Антони Матсeревич самолётнинг сўнгги дақиқалари моделлаштирилган видеосини тақдим этган.
Эслатиб ўтамиз, бортида Польша президенти Лех Качиньский ва мамлакат раҳбарияти вакиллари бўлган Ту-154М самолёти 2010 йил 10 апрелда Россиянинг Смоленск аэродромига қўниш чоғида қулаган. Саккиз нафар экипаж аъзоси ва 88 йўловчининг барчаси ҳалок бўлган.
Изоҳ (0)