Bugun,

  • USD 11095.31
  • RUB 173.84
  • EUR 10772.44

Tojikistonda “Ishqobod” chegara postiga 2019-yil noyabr oyida amalga oshirilgan hujum tufayli to‘rt nafar ayol va harbiylar jazolandi. Jami 9 nafar odam 2 yildan 27 yilgacha bo‘lgan muddatga ozodlikdan mahrum qilindi. Bu haqda Tojikiston Oliy sudi vakili Shermuhammad Shohiyonga tayanib, Asia-Plus xabar qilgan.

Foto: Tojikiston IIV matbuot xizmati

Foto: Tojikiston IIV matbuot xizmati

“Oliy sudning 20-apreldagi qaroriga ko‘ra, to‘rt nafar harbiy, to‘rt nafar ayol va bir nafar erkak hujumda aybdor deb topildi hamda 2 yildan 27 yilgacha muddatga ozodlikdan mahrum qilindi”, – degan Shohiyon.

Oliy sud vakili matbuot anjumanida harbiylarning nima uchun jinoiy javobgarlikka tortilganiga aniqlik kiritmagan. U ish maxfiy belgisi ostida ko‘rib chiqilgani va bu borada qo‘shimcha tafsilotlar ayta olmasligini bildirgan.

Eslatib o‘tamiz, 2019-yil 6-noyabrda mahalliy vaqt bilan 03:23 da qurollangan jangarilar guruhi Sultonobod chegara otryadining “Ishqobod” 4-zastavasiga hujum uyushtirgan. Maxsus operatsiya vaqtida guruhning 15 nafar a’zosi yo‘q qilingan va besh kishi qo‘lga olingandi.

Jangarilar so‘roq qilinganidan keyin ularning Afg‘oniston hududidan qochib o‘tgan IShID terrorchilari ekani aniqlangan. Hujum uyushtirganlarning barchasi Tojikiston fuqarolari bo‘lgani, qo‘lga olingan va halok bo‘lganlar orasida ayollar ham borligi xabar qilingandi. Afg‘oniston hukumati vakillari IShID terrorchilarining mamlakat hududidan Tojikistonga o‘tib, 6-noyabrda chegara postiga hujum uyushtirganini inkor etgan.

8-noyabr kuni Tojikiston bosh prokuraturasi chegara postiga uyushtirilgan hujum yuzasidan jinoyat ishi ochgan,  O‘zbekiston chegarachilari esa terrorchilik hujumidan so‘ng Tojikiston bilan chegaradosh hududlarni qo‘riqlashni kuchaytirgan.

Dastlab Tojikiston hukumati tomondan halok bo‘lganlar soni 2 nafar edi, keyinchalik ularning 6 nafar ekani ma’lum bo‘lgan. Chegarachilardan 26 yoshli Izatillo Abubakr, Dilovor Tolipov, Hofizjon Husainov, Naimjon Saidolimov, G‘anijon Davlat va uchastka noziri Bahrom Shahzoda vafot etgan.

IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.

Izoh
Asosiy yangiliklar
Sport
“Barselona” “Atletiko” futbolchisini xarid qilsa, Ansu Fati jamoadan ketishiga to‘g‘ri keladi 
Mahalliy
Shavkat Mirziyoyev transformator ishlab chiqaruvchi Aysel energy korxonasi faoliyati bilan tanishdi
Mahalliy
Toshkentdagi “Ippodromda” 2 bosh ot ochlikdan nobud bo‘ldi