Qozog‘iston koronavirus va pnevmoniya statistikasini birlashtiradi. Bu haqda mamlakat sog‘liqni saqlash vaziri Aleksey Soy ma’lum qildi, deya xabar bermoqda Tengrinews.
Foto: Tengrinews
“Koronavirus holatlarining umumqabul qilingan statistik hisobidan tashqari pnevmoniyaga ham e’tibor qaratish zarur. Ma’lumotlarning to‘liq shaffofligini ta’minlash maqsadida Sog‘liqni saqlash vazirligi tomonidan statistik ma’lumotlarni yuritish va shakllantirish bo‘yicha yangi uslublar umumlashtirildi. Jahon Sog‘liqni saqlash tashkilotining Yevropa mintaqaviy byurosi bilan o‘tkazilgan maslahatlashuvlardan so‘ng biz COVID-19 holatlarini yangi kodlar bo‘yicha kodlashtirish va hisobini yuritishga qaror qildik. Shunday qilib, laboratoriya sharoitida tasdiqlangan COVID-19 holatlari PZR-testi natijasi manfiy bo‘lgan, biroq koronavirusning klinik va epidemiologik belgilariga ega pnevmoniya holatlari bilan birlashtiriladi.
COVID-19 holatlarini xalqaro klassifikatsiyaning yangi kodlaridan foydalangan holda kodlashtirishga to‘liq o‘tish 1-avgustdan amalga oshiriladi. To‘plangan klinik tajribadan kelib chiqib, biz ushbu kasalliklarning o‘xshashligini va ularni davolashda yagona taktik usullardan foydalanish zarurligini qayd etmoqdamiz”, — dedi Qozog‘iston sog‘liqni saqlash vaziri Aleksey Soy.
Hozirgacha Qozog‘istonda faqat laboratoriya sharoitida tasdiqlangan COVID-19 holatlarigina hisobga olib kelinayotgan edi. Aleksey Soyning ta’kidlashicha, aksariyat mamlakatlar hali ham kasallik statistikasini shu yo‘sinda yuritmoqda.
Avvalroq Qozog‘iston Sog‘liqni saqlash vazirligi atipik pnevmoniyaga chalinganlarni koronavirus infeksiyasini yuqtirib olganlarning umumiy ro‘yxatiga kiritish masalasi bo‘yicha Jahon Sog‘liqni saqlash tashkilotining javobini kutayotganini ma’lum qilgan edi. Agar Qozog‘istonda pnevmoniya va koronavirus statistikasi birlashtirilsa, u holda koronavirusga chalinganlarga doir rasmiy raqam keskin o‘sadi: birgina 1—8-iyul kunlari oralig‘ida Qozog‘istonda 56 809 ta pnevmoniya holati qayd etilgan, ularning qanchasi viruslar oqibatida qo‘zg‘agani — noma’lum. Iyun oyida pnevmoniyadan Qozog‘istonda 628 kishi vafot etgan. Prezident To‘qayev ushbu muammoni yashirib bo‘lmasligini ta’kidlagan edi.
O‘z navbatida Qozog‘istondagi pnevmoniya holatlarini koronavirusning ko‘rinishi deb hisoblayotgan kuzatuvchilar soni oshib bormoqda. Xususan, Olmaotadagi neyroxirurgiya markazi mudiri Minjilqi Berdixo‘jayev Qozog‘iston Sog‘liqni saqlash vazirligini “statistikani o‘yin qilishni bas qilib”, atipik pnevmoniya holatlarini koronavirus sifatida ro‘yxatga olishga chaqirgan edi. JSST ham Qozog‘istondagi pnevmoniya holatlari “shunchaki noto‘g‘ri tashxis qilingan” holatlar deb hisoblamoqda.
Mavzuga doir: Qozog‘istonda o‘tgan bir sutka ichida yana 1707 kishida, Tojikistonda esa 46 kishida koronavirus aniqlandi
17-iyuldan boshlab Qirg‘iziston Sog‘liqni saqlash vazirligi mamlakatdagi koronavirus va pnevmoniya holatlari statistikasini, yagona davo choralarini ko‘rish maqsadida, umumlashtirib taqdim etishni boshlagani ma’lum bo‘lgan edi. Shu bois Qirg‘izistonda so‘nggi bir sutkada 1654 ta kasallanish holati qayd etildi (shundan 603 tasi laboratoriyada tasdiqlangan COVID-19), jami kasallanganlar soni 23 783 nafarga yetdi (shundan 13 101 tasi COVID-19), kasallikdan jami 785 ta, xususan, so‘nggi bir sutka ichida 83 ta o‘lim qayd etilgan (shundan 173 tasi COVID-19, xususan, oltitasi so‘nggi bir sutka ichida qayd etilgan).
