Қозоғистон коронавирус ва пневмония статистикасини бирлаштиришга қарор қилди. Аввалроқ Қирғизистон ҳам шундай қилганди

Қозоғистон коронавирус ва пневмония статистикасини бирлаштиради. Бу ҳақда мамлакат соғлиқни сақлаш вазири Алексей Цой маълум қилди, дея хабар бермоқда Tengrinews.

«Коронавирус ҳолатларининг умумқабул қилинган статистик ҳисобидан ташқари пневмонияга ҳам эътибор қаратиш зарур. Маълумотларнинг тўлиқ шаффофлигини таъминлаш мақсадида Соғлиқни сақлаш вазирлиги томонидан статистик маълумотларни юритиш ва шакллантириш бўйича янги услублар умумлаштирилди. Жаҳон Соғлиқни сақлаш ташкилотининг Европа минтақавий бюроси билан ўтказилган маслаҳатлашувлардан сўнг биз COVID-19 ҳолатларини янги кодлар бўйича кодлаштириш ва ҳисобини юритишга қарор қилдик. Шундай қилиб, лаборатория шароитида тасдиқланган COVID-19 ҳолатлари ПЗР-тести натижаси манфий бўлган, бироқ коронавируснинг клиник ва эпидемиологик белгиларига эга пневмония ҳолатлари билан бирлаштирилади.

COVID-19 ҳолатларини халқаро классификациянинг янги кодларидан фойдаланган ҳолда кодлаштиришга тўлиқ ўтиш 1 августдан амалга оширилади. Тўпланган клиник тажрибадан келиб чиқиб, биз ушбу касалликларнинг ўхшашлигини ва уларни даволашда ягона тактик усуллардан фойдаланиш зарурлигини қайд этмоқдамиз», — деди Қозоғистон соғлиқни сақлаш вазири Алексей Цой.

Ҳозиргача Қозоғистонда фақат лаборатория шароитида тасдиқланган COVID-19 ҳолатларигина ҳисобга олиб келинаётган эди. Алексей Цойнинг таъкидлашича, аксарият мамлакатлар ҳали ҳам касаллик статистикасини шу йўсинда юритмоқда.

Аввалроқ Қозоғистон Соғлиқни сақлаш вазирлиги атипик пневмонияга чалинганларни коронавирус инфекциясини юқтириб олганларнинг умумий рўйхатига киритиш масаласи бўйича Жаҳон Соғлиқни сақлаш ташкилотининг жавобини кутаётганини маълум қилган эди. Агар Қозоғистонда пневмония ва коронавирус статистикаси бирлаштирилса, у ҳолда коронавирусга чалинганларга доир расмий рақам кескин ўсади: биргина 1—8 июль кунлари оралиғида Қозоғистонда 56 809 та пневмония ҳолати қайд этилган, уларнинг қанчаси вируслар оқибатида қўзғагани — номаълум. Июнь ойида пневмониядан Қозоғистонда 628 киши вафот этган. Президент Тўқаев ушбу муаммони яшириб бўлмаслигини таъкидлаган эди.

Ўз навбатида Қозоғистондаги пневмония ҳолатларини коронавируснинг кўриниши деб ҳисоблаётган кузатувчилар сони ошиб бормоқда. Хусусан, Олмаотадаги нейрохирургия маркази мудири Минжилқи Бердихўжаев Қозоғистон Соғлиқни сақлаш вазирлигини «статистикани ўйин қилишни бас қилиб», атипик пневмония ҳолатларини коронавирус сифатида рўйхатга олишга чақирган эди. ЖССТ ҳам Қозоғистондаги пневмония ҳолатлари «шунчаки нотўғри ташхис қилинган» ҳолатлар деб ҳисобламоқда.17 июлдан бошлаб Қирғизистон Соғлиқни сақлаш вазирлиги мамлакатдаги коронавирус ва пневмония ҳолатлари статистикасини, ягона даво чораларини кўриш мақсадида, умумлаштириб тақдим этишни бошлагани маълум бўлган эди. Шу боис Қирғизистонда сўнгги бир суткада 1654 та касалланиш ҳолати қайд этилди (шундан 603 таси лабораторияда тасдиқланган COVID-19), жами касалланганлар сони 23 783 нафарга етди (шундан 13 101 таси COVID-19), касалликдан жами 785 та, хусусан, сўнгги бир сутка ичида 83 та ўлим қайд этилган (шундан 173 таси COVID-19, хусусан, олтитаси сўнгги бир сутка ичида қайд этилган).