Xorazmda kuchli shamol oqibatida salkam 13 mingta xonadon elektr energiyasiz qoldi

Xorazm viloyatida 2020-yil 10-iyuldan 11-iyulga o‘tar kechasi kuchli shamol kuzatilgan. Natijada 12900 ta xonadon besh soatgacha elektr energiyasiz qolgan. Bu haqda “Daryo”ga jurnalist Sohiba G‘oyipova xabar berdi.

Ta’kidlanishicha, kuchli shamoldan zarar ko‘rgan xonadonlar viloyatning Hazorasp, Yangibozor, Bog‘ot tumanlarida joylashgan.

Daraxtlar, xonadonlar tomining elektr simlariga qulashi natijasi Hazorasp tumanida 4 mingta, Bog‘ot tumanida 4 ming 600 ta, Yangibozor tumanida esa 4 ming 300 ta aholi xonadoni 3-5 soat davomida elektr energiyasiz qolgan.

Kuchli yomg‘irga aylangan shamol oqibatlarini bartaraf qilish va aholiga elektr energiyasi yetkazib berish maqsadida “Xorazm hududiy elektr tarmoqlari” AJ ishchi xodimlari tun davomida elektr tarmoqlarini qayta ulagan.

Qo‘shimcha qilinishicha, kuchli shamol viloyatning uchta tumanida kuzatilgan. Boshqa hududlarda bu kabi ko‘ngilsizlik ro‘y bermagan. Ayni vaqtda viloyatning barcha hududlarida elektr energiyasi qayta tiklangan.

Eslatib o‘tamiz, Xorazm viloyatida 2020-yilning 17-may kuni ham kuchli shamol kuzatilib, 15-25 metr/sekund tezlik bilan esgan shamol oqibatida korxona, tashkilot va turar joylarning tom qismlari uchib ketgan va pastga qulagandi. Buxoro viloyatida 2020-yilning 27-aprel kuni sodir bo‘lgan tabiiy ofat oqibatida shahar va tumanlarda 41 ming 927 ta bino va inshootlar talafot ko‘rgandi.