O‘zbekistonda kuniga 20-22 mingta test olinyapti, bu mingta aholiga nisbatan 42 tani tashkil etadi. Bu haqda Sog‘liqni saqlash vazirining birinchi o‘rinbosari, Respublika sanitariya-epidemiologik osoyishtalik agentligi direktori Bahodir Yusufaliyev 12-iyul kuni “O‘zbekiston 24” telekanaliga bergan intervyusida aytib o‘tdi.

Foto: “O‘zbekiston 24”

Bahodir Yusufaliyevning ma’lum qilishicha, koronavirusga o‘z-o‘zidan borib test topshirish kerak emas.

“Test, avvalo, bemorlar, ya’ni karantinda joylashgan shaxslardan va klinik-epidemiologik belgilari bo‘lgan shaxslardan olinadi. Undan keyin boshqa aholi qatlamlaridan test olinadi”, – dedi Respublika bosh sanitar-epidemiologi.

Uning alohida ta’kidlashicha, hech bitta davlat aholini 100 foiz test bilan qamrab olmagan va qamrab ham ololmaydi.

“Misol uchun, Janubiy Koreyada kuniga O‘zbekistonga o‘xshab 20 mingta test amalga oshiriladi. Undan tashqari, test olish normal holatda har ming aholiga nisbatan 26 tani tashkil qiladi. Endi O‘zbekistonni olsak, kuniga 20-22 mingta test olamiz va bu mingta aholiga nisbatan 42 tani tashkil etadi. Deyarli ikki barobar ko‘p”, – dedi Yusufaliyev.

Uning qo‘shimcha qilishicha, sog‘liqni saqlash tizimi o‘zining vazifasini bajaradi, lekin aholi, birinchi navbatda, tartib-intizomga – sanitariya- epidemilogiya talablarga, albatta, rioya qilishi kerak.

Eslatib o‘tamiz, Bahodir Yusufaliyev fevral oyi o‘rtalarida “Daryo”ga bergan intervyusida “Mabodo ushbu kasallik respublikamizga kirib kelsa, bu bo‘yicha ham tayyorgarligimiz bor. Tegishli shifoxonalarimizda o‘rinlar, dori vositalari va tibbiy buyumlar zaxirasi ajratilgan. Kerakli miqdorda tibbiy yordam tashkil etiladi”, degan edi.

Ma’lumot uchun, AQSh davlat kotibi Maykl Pompeo koronavirusdan himoyalanish uchun kerakli infratuzilmaga ega bo‘lmagan hududlardan biri sifatida O‘zbekistonni ham qayd etib, O‘zbekiston koronavirus kabi keng ko‘lamli xavfga qarshi tura olish imkoniyatiga ega emas, degan fikrni bildirgan edi.