Ispaniya hukumati koronavirus tarqalishi xavfi sababli mamlakatdagi o‘nlab ommabop plyajlarni yopdi. Bu haqda “Interfaks” xabar berdi.
Xususan, Andalusiyadagi 50 dan ortiq plyaj yopilgan, ulardan qariyb 30 tasi Malagada joylashgan. Ularning ko‘pchiligi joriy haftada qaytadan ish boshlashi kutilmoqda.
Mahalliy rasmiylarning bunday choralarni qo‘llashiga dam olish kunlarida plyajlar to‘lib ketgani va odamlar u yerda ijtimoiy masofani saqlamagani sabab bo‘lgan.
Koronavirus bilan bog‘liq vaziyat sababli mamlakatning shimoli-g‘arbidagi Galisiya viloyatida yaqinda bekor qilingan ba’zi cheklovlar qayta tiklangan. Dengiz bo‘yida joylashgan tumanlardan birining aholisiga mamlakatning boshqa hududlariga borish taqiqlangan. Bundan tashqari, u yerda niqob taqish majburiy etib belgilangan va 10 kishidan ortiq odamning to‘planishi taqiqlangan. Bar va restoranlar tashrif buyuruvchilar sonini 50 foizga qisqartirishi kerak.Shuningdek, 4-iyul kuni Kataloniyada ham cheklov choralari joriy qilingan. Segri hududida 200 mingdan ortiq odam karantinga olingan, ularning boshqa shaharga borishiga ruxsat etilmaydi.
Yangi kasallar sonining oshishi fonida bu kabi choralar mamlakatda amalga kiritilmoqda. Pandemiya davrida Ispaniyada umumiy hisobda taxminan 300 ming kishida koronavirus qayd etilgan, 28 mingdan ortiq bemor kasallik qurboniga aylangan.
Izoh (0)