Bosh vazir o‘rinbosari O‘ktam Barnoyev yilqichilik va ot sporti federatsiyasiga rais bo‘ldi

O‘zbekiston Respublikasi bosh vaziri o‘rinbosari O‘ktam Barnoyev O‘zbekiston yilqichilik va ot sporti federatsiyasi raisligiga saylandi.

6-iyul kuni tashkilotda navbatdan tashqari hisobot-saylov konferensiyasi bo‘lib o‘tdi. Onlayn majlisda O‘ktam Barnoyev nomzodi tavsiya qilindi va konferensiya ishtirokchilari tomonidan bir ovozdan ma’qullandi.

Shuningdek, konferensiyada federatsiya rahbariyati hamda 13 kishidan iborat ijroqo‘m a’zolari tarkibi ham tasdiqlandi. Unga ko‘ra, rais o‘rinbosarlari sifatida Feruz Abdullayev, Bahrom Norqobilov, Avaz Ismoilov va Kamol Xudoyberdiyev nomzodlari ma’qullandi. Shu bilan birga Kamol Xudoyberdiyev federatsiya bosh kotibi lavozimiga ham tasdiqlandi. Bungacha federatsiyada rais o‘rinbosari sifatida faoliyat olib borgan Bahrom Gaziyev hamda Akmal Toshevlar ham o‘z lavozimida qoldi.

O‘ktam Barnoyev (1964-yilda tug‘ilgan) 1997—2000-yillarda Buxoro viloyati Qishloq va suv xo‘jaligi boshqarmasi boshlig‘ining iqtisodiyot va islohotlar masalalari bo‘yicha o‘rinbosari sifatida ishlagan. 2000—2002-yillarda Qishloq va suv xo‘jaligi vazirligi tizimida rahbar lavozimlarda faoliyat olib borgan.

2002—2004-yillarda Vazirlar Mahkamasining agrosanoat majmuasida yetakchi mutaxassis, 2004—2005-yillarda hukumatning Qishloq va suv xo‘jaligi masalalari bo‘yicha axborot-tahlil departamenti mudiri, 2005—2007-yillarda Qishloq va suv xo‘jaligi, qishloq xo‘jaligi mahsulotlarini qayta ishlash va xalq iste’moli mahsulotlari axborot-tahlil departamenti mudiri lavozimlarida ishlagan.

Shuningdek, 2007—2008-yillarda qishloq va suv xo‘jaligi vaziri birinchi o‘rinbosari, 2008—2010-yillarda Samarqand viloyati hokimi, 2011—2016-yillarda Qishloq va suv xo‘jaligi vazirligining Respublika suv inspeksiyasi boshlig‘i, 2016-yilda “O‘zagrokimyo” kompaniyasi boshqaruvi raisi lavozimlarida faoliyat olib borgan. U 2016—2020-yillarda Buxoro viloyatiga hokimi lavozimida ishlagan. 2020-yilning fevral oyida Barnoyev bosh vazirning agrar va oziq-ovqat sohalarini rivojlantirish masalalari bo‘yicha o‘rinbosari lavozimiga tayinlagandi.