O‘zbekistonda koronavirus epidemiyasining tarqalishining oldini olish maqsadida 23-martdan e’tiboran ommaviy tadbirlar, xususan, to‘y-marosimlarning o‘tkazilishi taqiqlangan edi. Ushbu taqiqdan so‘ng to‘y marosimlarini o‘tkazishga uringanlarga nisbatan hatto jinoyat ishi ham qo‘zg‘atildi.
Mamlakatda epidemiologik vaziyat barqarorlashib, nisbatan nazorat ostiga olingach, Respublika maxsus komissiyasining 30-maydagi qarori bilan “yashil” toifaga kiritilgan hududlarda oilaviy tantana, to‘y, ma’raka va marosimlarni 30 kishidan ko‘p bo‘lmagan holda o‘tkazishga ruxsat berildi.
Ruxsat tegishi bilan, masalan, 1-iyun kuni Olmaliqda karantin talablari asosida, ko‘pi bilan 30 kishi ishtirokida o‘tkazilayotgan to‘yning suratlari tarqaldi. So‘nggi kunlarda esa mamlakatning turli nuqtalaridagi “yashil” hududlarda 30 kishi ishtirokida o‘tkazilayotgan marosimlari tarqaldi.
Foydalanuvchilar ularning ayrimlarini 1990-yillarda hovlilarda o‘tkazilgan to‘ylarga o‘xshatgan, boshqalar esa tor doiradagi marosimni ham 300 kishilik to‘y muhitida o‘tkazishga ishtiyoq topa olayotganlarni olqishlagan.
Ijtimoiy tarmoqlarda tarqalgan yana bir videoda marosim ishtirokchilari ayniqsa bolalar hisobiga ruxsat etilganidan ko‘proqdek ko‘rinadi. Bunga: “12 yoshdan kichik bolalar 30 kishiga qo‘shilmaydi”, deya hazil aralash munosabat bildirilgan.
Yana bir guruh foydalanuvchilar koronavirus jamiyat hayotining ko‘plab jihatlariga salbiy ta’sir qilgan bo‘lsa-da, o‘zbek xalqini “to‘y balosi”dan qutqarishda juda qo‘l kelganini, bunday kamchiqim va tartibli to‘y o‘tkazish an’anasini karantindan keyin ham saqlab qolish lozimligini ta’kidlagan.
Mavzuga doir:
- “Illat, dard, balo!”. Shavkat Mirziyoyevning dabdabali to‘ylar haqidagi barcha fikrlari (video)
- Shavkat Mirziyoyev: Olmazorliklar, 50 kishi bilan to‘y qilishni siz boshlab bering, butun Toshkentga namuna bo‘ling (video)
- “Nuroniy” jamg‘armasi vakili: “Dabdabali to‘y qilayotgan amaldorlarimizning tanobini ham bir tortib qo‘yish kerak”
Ma’lumot uchun, Respublika maxsus komissiyasi qaroriga ko‘ra, “yashil” hududlarda oilaviy tantana, to‘y, ma’raka va marosimlarni fuqarolarning uy-joyi va hovlisining o‘zida, faqat yaqin qarindoshlar va ushbu tuman hududida istiqomat qiluvchi boshqa qarindoshlar bilan, sanitariya va gigiyena talablariga qat’iy rioya etgan holda o‘tkazishga ruxsat beriladi.
O‘z navbatida karantin davrida oilaviy tantana, to‘y, ma’raka va marosimlarni o‘tkazishning belgilangan talablarini buzgan shaxslar epidemiyalarga qarshi kurash qoidalarini buzganlik uchun ma’muriy javobgarlikka tortiladi.
Mavzuga doir:
- Muborak hokimi ishdan olindi. Avvalroq tumanda shifokorlar karantin vaqti to‘y qilgani aytilgan edi
- Jizzaxlik ota o‘g‘lining armiyadan kelgani munosabati bilan karantin vaqtida ziyofat uyushtirgani aniqlandi
- Shavkat Mirziyoyev karantin vaqtida to‘y-marosim o‘tkazganlarni “mas’uliyatsizlar” deb atadi
- Mavluda Asalxo‘jayeva karantin vaqtida o‘tkazilgan to‘yga borgani haqidagi xabarga izoh berdi (video)
