Navoiy viloyatida 3-iyun kuni bir yo‘la 42 nafar bemor sog‘ayib, reabilitatsiyaga kuzatildi, deb xabar bermoqda SSV matbuot xizmati.
Tuzalganlarning barchasi viloyatning o‘zidan (32 nafari Zarafshon shahridan, 4 nafari Xatirchi tumanidan, 3 nafari Tomdi tumanidan, 2 nafari Konimex tumanidan, 1 nafari esa Navoiy shahridan) bo‘lib, 26 nafari erkak, 16 nafari ayol. Ularning yoshi kattasi 71 yoshli onaxon, kichigi 2018-yil tug‘ilgan.
Ta’kidlanishicha, vazirlik tomonidan Navoiy viloyati uchun maxsus ishchi guruh tuzilib, ushbu hududga safarbar qilingan. Ular hududda koronavirus infeksiyasi tarqalishining oldini olish borasida amalga oshirilayotgan profilaktik va epidemiyaga qarshi tadbirlarni yanada kuchaytirish, bemorlarni samarali davolash borasida mahalliy mutaxassislarga yaqindan amaliy yordam ko‘rsatmoqda. Ularning sa’y-harakatlari natijasida so‘nggi ikki kunda bir yo‘la 84 nafar bemor tuzalgan.
Ayni paytda viloyatda 164 nafar fuqaroda koronavirus infeksiyasi aniqlangan. Hozirda ulardan 96 nafari sog‘aygan bo‘lsa, qolgan 68 nafari davolanishda davom etmoqda.
Bugunning o‘zida Namangan viloyatida 4 nafar, Samarqand viloyatida esa 7 nafar kishi koronavirusdan tuzalib, O‘zbekistonda koronavirusdan sog‘ayganlar soni 2 919 nafarga yetgani xabar berilgan edi. Endi esa ular soni 2 961 nafarga yetdi.
Kasallanganlarning umumiy soni esa 3-iyun soat 10:00 holatiga ko‘ra, 3 769 kishini tashkil qilmoqda, bemorlarning 15 nafari koronavirus infeksiyasi asoratlari oqibatida vafot etgan.
Izoh (0)