Jizzax viloyatining Sharof Rashidov tumanida 30-may kuni yuz bergan yo‘l-transport hodisasi oqibatida 6 yoshli bola vafot etdi. Bu haqda YHXBB xabar bermoqda.
Hodisa 30-may kuni soat 19:30 larda “Ravalliq” MFYdagi Gulshan ko‘chasida sodir bo‘lgan. 1959-yilda tug‘ilgan T.N. ismli erkak “Gaz-69” rusumli transport vositasida stol-stullarni shu ko‘chadagi yashovchi N.Z.ning xonadoniga olib kelgan va mashinani qarovsiz qoldirgan.
Birga kelgan tanishi, 2005-yilda tug‘ilgan S.E. ismli o‘g‘il bola avtomobilni o‘zboshimchalik bilan haydamoqchi bo‘lib, yurgizib yuborishi natijasida voyaga yetmagan piyoda, shu uyning oldida o‘ynab yurgan, 2014-yilda tug‘ilgan B.X.ni urib yuborib, YTH sodir etgan.
6 yoshli o‘g‘il bola og‘ir tan jarohatlari olib, voqea joyida vafot etgan.
Mazkur holat yuzasidan Sharof Rashidov tuman IIB huzuridagi TB tomonidan Jinoyat Kodeksining 266-moddasi 2-qismi (Odam o‘limiga sabab bo‘lgan transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilgan.
YHXBB barcha haydovchilardan transport vositasini ochiq holda, kaliti bilan qarovsiz qoldirmaslikni, ota-onalar farzandlariga e’tiborli bo‘lishini so‘rab qoldi.
Izoh (0)