Ford avtokonserni Police Interceptor Utility politsiya yo‘ltanlamaslariga yangi funksiya — o‘z-o‘zini dezinfeksiya qilish rejimini tatbiq etdi, deb yozadi “Korrespondent.net”.
Endilikda avtomobilda Selsiy shkalasi bo‘yicha 56 daraja isitish faollashtirilganidan keyin salon dezinfeksiya qilinadi. Yangi funksiya hamma viruslar, jumladan, COVID-19’ni ham o‘ldiradi.
Huquq-tartibot organlari xodimlariga mo‘ljallangan ushbu avtomobil saloniga hech qanday qo‘shimcha qurilmalar o‘rnatish kerak emas. Kompaniya mutaxassislarining qayd etishicha, shunchaki 2013—2019-yillarda ishlab chiqarilgan avtomobillarda dasturiy ta’minotni yangilash kerak bo‘ladi.
Tizim faollashtirilishi bilan haydovchidan salonni tark etish talab qilinadi. O‘z-o‘zini dezinfeksiya qilish amalga oshirilganidan so‘ng esa avtomatik ravishda salonni sovitish uchun konditsioner ishlay boshlaydi.
Kompaniya vakillarining aytishicha, ushbu tizim mashina salonidagi 99 foiz viruslarni o‘ldiradi.
Politsiyachilar o‘z mashinalarida turli toifadagi insonlar, shu jumladan, koronavirus simptomlari kuzatilayotganlarni ham olib yuradi.
Ford muhandislari ushbu tizimni ishlab chiqarishda olimlarning avtomobil ichidagi yuqori harorat xavfli mikroorganizmlarni o‘ldirishi haqidagi tadqiqotlariga tayanib ish tutgan.
Izoh (0)