“Yandeks” tahlilchilari dunyoning turli shaharlarida karantin choralari yumshatila boshlaganidan so‘ng ko‘chalardagi harakatlanish qanchalik o‘zgarganini o‘rganib chiqdi.

Yangi tadqiqotda turli davlatlardagi 42 ta shahar tahlil qilingan bo‘lib, ular orasida Toshkent ham bor. Grafikadagi foizlar qanchalik yuqori bo‘lsa, shaharlardagi harakatlanish shunchalik ko‘p bo‘lganini bildiradi. Foizlar kam bo‘lsa esa — aksincha.

Hisob-kitoblarni amalga oshirishda “Yandeks” servislaridagi ma’lumotlardan, Apple’ning foydalanuvchilar harakati soni haqidagi ochiq statistikasidan, shuningdek, dunyoning turli shaharlarida avtomobillar harakati to‘g‘risidagi ma’lumotlarni to‘playdigan Otonomo kompaniyasi ma’lumotlaridan foydalanilgan.

Faollik darajasini ko‘rsatuvchi grafikada 17-fevraldan 22-maygacha bo‘lgan holat ko‘rsatilgan.

Avvalroq “Yandeks” O‘zbekistonning yirik shaharlarida izolyatsiyalanish darajasini baholay boshlagani xabar qilingandi. Toshkentda avtomobildan foydalanishga qisman ruxsat berilgach, 1-may kuni Toshkent ijtimoiy izolyatsiya bo‘yicha reytingda mart oxiridan beri 4 balldan kamroq ko‘rsatkich qayd etgandi.