Surxondaryo viloyati bojxona boshqarmasi “Sariosiyo” temir yo‘l chegara bojxona posti orqali O‘zbekiston hududidan tranzit orqali olib o‘tilayotgan katta miqdordagi psixotrop moddalar aniqlandi. Bu haqda Davlat bojxona qo‘mitasi xabar berdi.

Foto: Davlat bojxona qo‘mitasi

Viloyat bojxona boshqarmasi hamda “Sariosiyo” temiryo‘l chegara bojxona posti xodimlari “Quduqli” temir yo‘l bekatiga kirib kelgan, O‘zbekiston hududidan olib o‘tilayotgan temiryo‘l yuk vagonini bojxona nazoratidan o‘tkazdi.

Natijada yuk vagonlarining birida jami 11 900 ta qutida 238 000 dona “Sonlayf-Zopiklon 7,5 mg” nomli psixotrop tabletka borligi aniqlandi.

Foto: Davlat bojxona qo‘mitasi

Ta’kidlanishicha, ushbu psixotrop tabletkalarni respublika hududidan tranzit orqali olib o‘tishga Vazirlar Mahkamasining 2015-yil 12-noyabrdagi 330-sonli qarori talablari asosida maxsus ruxsatnoma bo‘lgan holdagina ruxsat etiladi.

Hozirda mazkur holat yuzasidan bojxona tekshiruvlari davom ettirilmoqda.