Navoiy viloyatining Navoiy shahrida 5-may kuni odam o‘limi bilan yakunlangan yo‘l-transport hodisasi sodir bo‘ldi. Bu haqda YHXBB xabar berdi.
Hodisa soat 04:40 larda Islom Karimov ko‘chasida yuz berdi. 1994-yilda tug‘ilgan D.N. Nexia-3 avtomobilini yuqori tezlikda boshqarib kelib, svetoforning taqiqlovchi qizil chirog‘iga to‘xtamasdan chorrahadan o‘ngga tezlik bilan burilgan. Shu vaqtda boshqaruvni yo‘qotib, yo‘l chetidagi simyog‘ochga urilgan.
YTH oqibatida 26 yoshli D.N. og‘ir tan jarohatlari olib voqea joyida vafot etgan.
Mazkur holat yuzasidan Navoiy shahar IIB TB tomonidan surishtiruv ishlari olib borilmoqda.
Eslatib o‘tamiz, 4-may sanasida yuz bergan ikkita YTH odamlar o‘limiga sababchi bo‘lgandi. Samarqandning Urgut tumanida “Jiguli” va yuk mashinasi to‘qnashishi oqibatida 22 yoshli ayol va uning 2 yoshli bolasi, Qashqadaryoning G‘uzor tumanida Lacetti asfalt yotqizish mashinasiga urilishi oqibatida 31 yoshli haydovchi vafot etgandi.
Izoh (0)