Foto: AQShda noyob mashina auksionga qo‘yildi. Bu mashinaning ikkita oldi tomoni bor, orqa tomoni esa yo‘q​

Mecum kimoshdi savdolar uyi odatda noyob va kolleksion avtomobillarni sotish bilan shug‘ullanadi, biroq bu safargi Dodge Double Header (“ikki boshli”), shubhasiz boshqa avtomobillardan ajralib turadi. U yagona nusxada bo‘lib, iyun oyida kimoshdi savdolariga qo‘yilishi kutilmoqda, deb xabar qiladi Carakoom.

Mazkur noodatiy loyiha 1981-yilgi Dodge Colt va 1981-yilgi Plymouth Champ kombinatsiyasini o‘zida mujassamlashtirgan.

Lotning o‘ziga xosligi haqida hech qanday ma’lumot berilmagan. Shunisi ma’lumki, ikkala mashina teng yarmidan bo‘linib, keyin birlashtirilgan. Hosil bo‘lgan kombinatsiya aslida u qadar yomon emas, ish ham sifatli bajarilgan. Natijada avtomobilning ikki boshi bir-biriga nisbatan ko‘zgudagi aksdek ko‘ringani sababli avtomobil simmetrik tus olgan.

Avtomobil saloni ham qiziqarli tarzda jihozlangan. Salonning bir qismi qizil aralash qora rangli charm qoplangan o‘rindiqlardan iborat bo‘lsa, qolgan yarmi aksicha — qora aralash qizil rangli o‘rindiqlar.

Kapotlar ostida 80 ot kuchiga ega 1,6 litrli to‘rt silindrga ega dvigatel o‘rin olgan. Ularning har biri alohida to‘rt pog‘onali uzatmalar qutisiga ulangan. Avtomobilning har ikki tomonidan ham boshqarish mumkin.