Prezident Shavkat Mirziyoyev 10-aprel, juma kuni, Turkiy tilli davlatlar hamkorlik kengashining koronavirus infeksiyasi tarqalishiga qarshi kurashishda hamkorlikni kuchaytirish va sa’y-harakatlarni birlashtirish uchun videoanjuman tarzida o‘tkazilgan navbatdan tashqari sammitida ishtirok etdi. Bu haqda Prezident matbuot xizmati xabar berdi.
Ozarbayjon Respublikasi prezidenti Ilhom Aliyev raisligida o‘tgan tadbirda, shuningdek, Turkiya Respublikasi prezidenti Rajab Toyyib Erdo‘g‘on, Qirg‘iziston prezidenti So‘ronboy Jeenbekov, Qozog‘iston prezidenti Qosim-Jo‘mart To‘qayev, Turkmaniston prezidenti Gurbanguli Berdimuhamedov, Vengriya bosh vaziri Viktor Orban hamda kengash bosh kotibi Bahdat Amreyev, shuningdek, Jahon sog‘liqni saqlash tashkiloti (JSST) bosh direktori Tedros Adan Gebreyesus ishtirok etdi.
Kun tartibiga muvofiq, pandemiyaga qarshi kurashish borasida mamlakatlarda ko‘rilayotgan birinchi navbatdagi chora-tadbirlar to‘g‘risida fikr almashildi. Tomonlar epidemiologik nazoratni ta’minlash, aholining ijtimoiy himoyaga muhtoj qatlamlarini muhofaza qilish, murakkab sharoitda iqtisodiyot tarmoqlari va biznesni qo‘llab-quvvatlash bo‘yicha amalga oshirilayotgan kompleks tadbirlar to‘g‘risida ma’lumot berdi.
Koronavirusga qarshi kurashishda tajriba va eng namunali amaliyot almashish maqsadida yaqindan hamkorlik qilish, savdo-iqtisodiy, investitsiya va transport-kommunikatsiya sohalaridagi qo‘shma loyihalarni muvofiqlashtirish va qo‘llab-quvvatlash muhim ekani ta’kidlandi, deyiladi xabarda.
Avval Shavkat Mirziyoyev Turkiy kengashning koronavirusga qarshi kurashga bag‘ishlangan videosammitida ishtirok etishi haqida xabar berilgandi.
Izoh (0)