“Sahar” guruhi xonandasi Anvar Jo‘rayev MyDay Stories dasturiga bergan intervyusida 16 yil avval Qozog‘istonga ko‘chib ketishga uni nima majbur qilgani haqida gapirdi.

Foto: Instagram / @anvar_sahar

“16 yil avval vaziyat shuni taqozo etgan va biz ko‘chib ketishga majbur bo‘lganmiz. O‘z ixtiyorimiz bilan albatta. Bu ko‘proq musiqiy qiziqish bilan bog‘liq. O‘shanda Qozog‘istonda jonli musiqa yo‘nalishi rivojlanayotgan edi. Bu o‘zimizni boshqa davlat estradasida sinab ko‘rish istagi ham bo‘lgan. Do‘stlarim chaqirishgan, kelinglar bu yerda sharoitlar yaxshi, qiziq, deyishgan. Shunday qilib ketganmiz. 20 yoshingda ryukzakni yelkangga osib, uydan chiqib ketaverasan”, — deydi Anvar Jo‘rayev.

Loyiha muallifi xonandadan O‘zbekistondagi mashhurlik va muxlislarni tashlab, Qozog‘istonda hammasini boshidan boshlashga uni nima majbur qilgani haqida so‘radi.

“O‘sha paytda O‘zbekistonda to‘yga mos shou-biznes shakllangan edi. Ya’ni, hamma pul to‘ydan tushgan. Biz esa sal boshqacharoq stadionlar bo‘ylab konsertlar, davlatlar bo‘ylab turlar tashkil etishni nazarda tutuvchi yo‘nalishda ishlagimiz kelgan. Tinglovchilarimiz bor edi, bizni yaxshi ko‘rishardi. Lekin biz bilan nima qilishni bilishmasdi. Musiqamiz zo‘rligini, yurakdan chiqayotganini odamlar bilardi, lekin bizni to‘yga chaqirishsinmi yoki boshqa tadbirlarga chaqirib, baraban sadolari ostida ovqatlanishsinmi, xullas, nima qilishni bilishmasdi biz bilan.

Biz ham hamma qatori boyib ketishni, mashhur bo‘lishni orzu qilardik. Keyin oila qurdik va biz nimanidir o‘zgartirish kerakligini tushundik”, — deya javob beradi xonanda.

Ma’lumot uchun, “Sahar” guruhi yakkaxoni Anvar Jo‘rayev 2004-yilda Qozog‘istonning Olmaota shahriga ko‘chib ketgan. Xonanda hozirgacha Olmaotada yashab, ijod qiladi.

“O‘shanda O‘zbekistondan ketmaganimda nima bo‘lardi, bilmayman. Onam nuqul menga ‘agar O‘zbekistonda qolganingda allaqachon xalq artisti bo‘larding’, deydi. Lekin men ijod qilishdan to‘xtamadim. Olmaotada ko‘chada yursam odamlar meni tanishadi, ‘siz to‘yimga borgansiz, tug‘ilgan kunimga borgansiz’ deyishadi, suratga tushishadi”, — deya qo‘shimcha qiladi Anvar Jo‘rayev.

Avvalroq Anvar Jo‘rayev o‘zi tug‘ilib o‘sgan Buxoro shahrining karantin tufayli huvillab qolgan diqqatga sazovor maskanlari suratlari bilan bo‘lishgan edi.