O‘zbekistonda koronavirusga chalinganlar soni 7-aprel Toshkent vaqti bilan soat 23:59 holatiga ko‘ra, 16 kishiga oshib, 520 nafarga yetdi. Bu haqda Sog‘liqni saqlash vazirligi xabar berdi.
Avvalroq 7-aprel Toshkent vaqti bilan soat 15:00 holatiga ko‘ra, virusni yuqtirib olganlar soni 32 kishiga oshib, 504 nafarga yetgani ma’lum qilingandi.
6-aprel soat 09:00 holati bo‘yicha kamida 31 nafar bemorda pnevmoniya alomatlari kuzatilayotgan edi; to‘qqiz bemorning ahvoli og‘ir deb baholangan, ulardan ikki nafari sun’iy nafas olish apparatiga ulangan edi.
O‘zbekistonda koronavirusga chalinish bilan bog‘liq ilk holat 15-mart kuni aniqlangan bo‘lsa, o‘tgan davr mobaynida 30 kishi sog‘aydi, ikki kishi kasallik qurboni bo‘ldi.
So‘nggi ma’lumotlarga ko‘ra, AQShning Nyu-York shahrida koronavirusdan vafot etgan o‘zbekistonliklar soni uch nafarga yetdi. Bundan tashqari, Armaniston, Qozog‘iston va Avstriyadagi O‘zbekiston fuqarolarida ham koronavirus aniqlangani haqida xabar berilgan edi.
6-aprel, dushanba kuni, koronavirus infeksiyasini yuqtirib olganlar soni kun davomida 115 nafarga oshgandi. Bu bir kunda aniqlangan bemorlar soni bo‘yicha rekord natija hisoblanadi. 7-aprel kuni esa bir sutka davomida kasallanganlar soni 63 nafarni tashkil etdi.
