Toshkentda koronavirus sababli aholi o‘rtasida vahima kelib chiqqanidan so‘ng kartoshka iste’moli keskin ortdi. Bu haqda Toshkent shahar hokimining birinchi o‘rinbosari Hotambek Shokirov Xalqaro press-klubning koronavirus mavzusiga bag‘ishlangan navbatdagi sessiyasida ma’lum qildi.
Foto: “Daryo”
Uning aytishicha, ilgari poytaxt aholisi bir kunda maksimal darajada 100 tonna kartoshka iste’mol qilgan, hozir esa unga bo‘lgan talab 150 tonnaga yetgan.
“Kartoshka vahimasi boshlangan vaqtdan esa bir kunda uch kunlik kartoshka iste’mol qilinmoqda. Shunday bo‘lsa ham bizda kartoshka yetkazib berish bilan bog‘liq muammo bo‘lmayapti”, — degan u.
Shuningdek, uning qo‘shimcha qilishicha, Toshkent aholisi bir kunda 50 tonna go‘sht mahsulotlarini iste’mol qilmoqda. Ulardan 30 tonnasi mol go‘shtidir.
“Odamlarimiz biror mahsulotni sotib olish uchun navbatda turganlar qatorini ko‘rib, o‘sha mahsulotni rejalashtirganlaridan ko‘ra ko‘proq sotib olmoqda”, — deydi Hotambek Shokirov.
Avvalroq Toshkent shahar hokimligi bozorlardagi navbatlarga munosabat bildirib, oziq-ovqat tanqisligi bo‘lmasligini ma’lum qilgandi. Qishloq xo‘jaligi vazirligi ham qishloq xo‘jaligi mahsulotlari yetishmovchiligi bo‘lmasligini bildirgan.
