Qashqadaryo viloyatining Chiroqchi tumanida ikki sinfdoshning o‘zaro janjali ulardan birining o‘limi bilan yakunlandi. Viloyat prokuraturasi qotillik qanday sodir etilgani haqida ma’lumot berdi.

Foto: Sputnik

Qayd etilishicha, Chiroqchi tumani Chiyal jamoa xo‘jaligidagi an’analarga ko‘ra, har yilgi Navro‘z bayrami arafasida qishloq aholisi tomonidan bayram tadbirlari o‘tkazish tashkillashtirilib kelingan.

2020-yilgi Navro‘z bayramini shu qishloqda 1986-yilda tug‘ilgan yigitlar tomonidan pul yig‘ishib, bayram qilib berish, bayram tadbiriga taniqli estrada xonandalaridan taklif etish va boshqa xarajatlarini ko‘tarish lozim bo‘lgan.

Ayblanuvchi N.O. ham sinfdoshlari bilan birga Navro‘z bayramining tashkiliy masalalari haqida maslahat qilish uchun yig‘ilib, yig‘inda ko‘p miqdorda spirtli ichimlik iste’mol qilgan.

Maslahat oshida sinfdoshi marhum S.Ya. bilan suhbat davomida bayramda oshpaz tanlash masalasida o‘zaro og‘zaki tortishib qolgan.

Ayblanuvchi N.O. uyiga qaytganidan so‘ng marhum S.Ya. bilan telefon orqali yana tortishib, o‘zaro bir-birlarini haqorat qilgan.

Shundan so‘ng N.O o‘zining yashash xonadonidan oshxona pichog‘ini olib, marhumning yashash xonadoniga borgan, uni uyidan topolmagach yashash uyiga qaytishida qishloqdagi ko‘prik ustida marhum S.Ya.ni uchratib qolib, yonidagi pichoqni S.Ya.ga sanchib uni qasddan o‘ldirgan.

Mazkur holat yuzasidan 14-fevral kuni Chiroqchi tumani prokuraturasi tomonidan Jinoyat kodeksining 97-moddasi (Qasddan odam o‘ldirish) 1-qismi bilan jinoyat ishi qo‘zg‘atilib, hozirda tergov harakatlari olib borilmoqda.