O‘zbekiston Prezidenti Shavkat Mirziyoyev Turkiya prezidenti Rajab Toyyib Erdo‘g‘onning taklifiga binoan 19-fevral kuni rasmiy tashrif bilan Turkiyaga keldi.
Prezident matbuot xizmatining xabar berishicha, Esonbug‘a xalqaro aeroportida davlat rahbarini Turkiya hukumati a’zolari, Anqara muzofoti va shahri rahbariyati, boshqa rasmiy shaxslar kutib oldi.
Bugun, 19-fevral kuni, prezidentlar raisligida Oliy darajadagi strategik hamkorlik kengashining birinchi yig‘ilishi bo‘lib o‘tadi. Muzokaralarda ko‘p qirrali O‘zbekiston—Turkiya munosabatlari, avvalo, siyosiy, savdo-iqtisodiy, investitsiyaviy, moliyaviy, transport-kommunikatsiya, ta’lim, madaniy-gumanitar va boshqa sohalardagi hamkorlikni kengaytirish masalalari muhokama qilinadi.
Prezident, shuningdek, Turkiya biznesining yetakchi vakillari bilan uchrashuv o‘tkazishi, Turkiya prezidenti Xalq kutubxonasining tantanali ochilish marosimida qatnashishi rejalashtirilgan.
Shavkat Mirziyoyev so‘nggi marta Turkiya rahbari Rajab Toyyib Erdo‘g‘onning taklifiga binoan, 2017-yil 25-oktabr kuni davlat tashrifi bilan Turkiyaga tashrif buyurgandi. Turkiya prezidenti Rajab Toyyib Erdo‘g‘on esa 2018-yil 29-aprel kuni davlat tashrifi bilan O‘zbekistonga kelgandi.
Izoh (0)