Farg‘onadagi Al-Farg‘oniy nomidagi istirohat bog‘ida 2-yanvar kuni inson o‘limi bilan tugagan favqulodda holat yuz berdi. Bu haqda Bosh prokuratura matbuot xizmati “Daryo”ga ma’lum qildi.

Booster Max nomli attraksion ishlab turgan vaqtida uning boltlari yechilib, detallaridan biri chiqib ketgan. Ushbu detal attratsionda uchayotgan 32 yoshli N.Yu. ismli ayolning boshiga kelib tushgan.

“Ayol tan jarohati olib, Respublika shoshilinch tibbiy yordam ilmiy markazi Farg‘ona filialiga olib borilgan va ko‘rsatilgan tibbiy yordamga qaramay vafot etgan”, — deyiladi rasmiy axborotda.

Qayd etishlaricha, hodisa yuzasidan Farg‘ona shahar prokuraturasi tergovoldi tekshiruv olib bormoqda. Ma’lum bo‘lishicha, fojiaga sabab bo‘lgan attraksion 2019-yil dekabrida bog‘ga o‘rnatilgan.

Avvalroq Namangandagi “Afsonalar bog‘i”da bir ehtiyotsizlik oqibatida attraksionning temir trubasiga urilib, vafot etgan edi. Undan avvalroq esa Jizzaxdagi “Istiqlol” bolalar bog‘ida “Uchar likopcha” attraksioni tutqichi sinib, uzilib tushishi oqibatida bir qiz vafot etgan, Samarqanddagi ishlab turgan attraksiondan bir qiz otilib chiqib ketgan edi.

Namangandagi fojiadan so‘ng viloyat hokimligi hududdagi barcha attraksionlar tekshirilishi haqida bayonot bergandi. Jizzaxdagi fojiadan so‘ng esa Sanoat xavfsizligi davlat qo‘mitasi mamlakatdagi barcha attraksionlarda tekshiruvlar o‘tkazib, O‘zbekistonda ishlab chiqarilgan attraksionlar talabga to‘liq javob bermasligi haqida xulosa bergandi.