Rossiyaning Yaroslav viloyatida joylashgan “Yaroslav broyler” parrandachilik fabrikasi ishchilari maoshlar kamligi va mehnat sharoitining yomonligi sabab ish tashlash e’lon qilib, fabrikadan ketib qoldi, deb xabar beradi “76.ru”.
“Kechadan oldingi kuni oylik berildi, biroq bu ularni qoniqtirmadi. Ularning aytishicha, bu odatdagidan kam ekan. Boshliqning oldiga kelishdi va ‘yoqmasa, ketaveringlar’ degan javobni olishdi”, — deydi fabrika xodimlaridan biri.
Ishchilar boshliqning aytganini qilib, fabrikadan keta boshlagan. Ma’lumotlarga ko‘ra, ishchilar o‘zlari uchun ikkita avtobus buyurtma qilib, jo‘nab qolishgan. Ishlab chiqarish to‘xtab qolmasligi uchun dam olayotgan ishchilar yordamga chaqirilgan, hatto rahbariyat ham oddiy ishchilar kabi mehnat qila boshlagan.
Bu kabi rejimda ishlash hech kimga yoqmagani sabab zavod ishchilarni qaytarishga uringan va ularning ortidan quvgan.
“Soat 07:30 larga yaqin YXHB xodimlari ichida o‘zbekistonlik muhojirlar bo‘lgan, Yaroslav tomon harakatlanayotgan avtobusni to‘xtatishgan. Xodimlar avtobus va yo‘lovchilarning hujjatlaridan hech qanday kamchilik topmagan”, — deydi Yaroslav viloyati IIBB xodimi.
Inspektorlar O‘zbekiston fuqarolarini qo‘yib yuborgan. Biroq fabrika rahbariyati ishchilarni qaytarishga muvaffaq bo‘lgan. Rahbariyat bunga qanday qilib erishgani noma’lum.
Gap-so‘zlarga ko‘ra, ularga yetmayotgan pullari to‘langan va oylik borasida boshqa aldamaslikka va’da berishgan.
Izoh (0)