“Orangizda onam bo‘lsaydi”, “Dadamga ichirmanglar”, “Yoshlik bizni tashlab ketadi”, “Jayra-jayra”, “Dadamning muxlislari”, “Malikam”, “Uyga quruq qaytmasin erkak” kabi yuzlab ommalashgan qo‘shiqlarning muallifi, shoir Mirzo Karim uysiz yashayotgani, oilasi va farzandlari bilan o‘n yillardan buyon ijara uylarda sarson bo‘lib yurgani haqida “Daryo” ga bergan intervyusida gapirib bergan edi.
Jurnalist Feruz Muhammad shoir Mirzo Karimning ijara uyida ikkinchi marotaba mehmon bo‘lib, shoirga qanday amaliy yordam bo‘lgani bilan qiziqdi.
Aytishim mumkinki, shu kunlarda Farg‘onaga borganimda viloyat hokimi hamda Buvayda tuman hokimiga uchradim. Ular deyarli, bu masalani hal qilib berishdi. Birinchi to‘lovni deyarli to‘lab berishdi. Shuning uchun barchalaridan minnatdorman. Hammasidan Alloh rozi bo‘lsin. Hokim buvamiz ham ‘Farg‘onadan uy beraman, kelib shu yerda yashang’, dedilar. Keyin men Toshkentga o‘rnashib qolganimni aytdim. Ancha gaplashdik. Xuddi shu gapni Buvayda tuman hokimi ham qaytarib aytdilar. ‘Qishlog‘ingizni yonidan yangi uylar qurilyapti, birinchi to‘lovlariga yordam beramiz, kelib yashang’, deyishdi. Hammasiga minnatdorchiligimni aytdim. Yordam qilayotganlarini aytmasligimni xohlashgandi. Lekin, aytmasam noinsoflikka o‘xshab qolyapti. Ammo, ular aytmang deyishgandi.
Shu yurtni farzandi ekanman yurtdoshlarim qadrlashyapti, buni juda yuksak baholayman. Muxlislar orasida ham qaysidir san’atkordan ranjib qolishlar uchrayapti, ranjishga o‘rin yo‘q. Men uchun qayg‘uga botgan muxlislarga aytmoqchimanki, xotirjam bo‘linglar. Xudo xohlasa hammasi yaxshi, bizga undan ortig‘i kerak ham emas. Hozir bitta rejamiz turibdi, o‘sha rejamiz amalga oshib qolsa xudo xohlasa, bo‘ldi, undan keyin qolganiga o‘zimizning qurbumiz yetadi, bizning ham qo‘limiz tosh ostida emas.
Mirzo Karim, shoir
