Nukusda Qoraqalpoq tibbiyot institutini tashkil etish ko‘zda tutilgan. Hukumatning bu haqdagi tegishli qarori loyihasi jamoatchilik muhokamasi uchun e’lon qilindi.
Qaror loyihasiga ko‘ra, yangi oliygoh Toshkent pediatriya tibbiyot institutining Nukus filiali negizida tashkil etiladi. Ushbu taklif O‘zbekiston Sog‘liqni saqlash vazirligi, Oliy va o‘rta maxsus ta’lim vazirligi, Iqtisodiyot va sanoat vazirligi, Moliya vazirligi va Qoraqalpog‘iston Jo‘qorg‘i Kengesi tomonidan berilgan.
Qoraqalpoq tibbiyot instituti faoliyatining asosiy yo‘nalishlari etib
- zamonaviy talablarga mos keladigan va hozirgi zamon tibbiyotining ilg‘or texnologiyalarini egallagan yuqori malakali tibbiyot kadrlari va ilmiy mutaxassislarini tayyorlash;
- respublikaning oliy tibbiyot ta’limi tizimida tibbiyot sohasi bo‘yicha o‘quv jarayonini tashkil etishda zamonaviy ta’lim texnologiyalari asosida axborot va multimedia uskunalaridan foydalangan holda ilg‘or xorijiy tajribani joriy etish;
- oliy ta’limning investitsiyaviy jozibadorligini oshirish, xorijiy ta’lim va ilm-fan texnologiyalarini jalb etish;
- kasalliklarini erta aniqlash va davolashda tibbiyot sohalaridagi ilg‘or yutuqlardan foydalangan holda fundamental, innovatsion, ilmiy-amaliy tadqiqotlar va ishlanmalarni amalga oshirish;
- aholiga tibbiyot sohasida yuqori malakali davolash-profilaktika yordamini ko‘rsatgan holda kasalliklar diagnostikasi, profilaktikasi va ularni davolashning ilg‘or innovatsion usullarini tatbiq etish;
- ta’lim, fan, innovatsiya va ilmiy-tadqiqotlar natijalarini tijoratlashtirish faoliyatining uzviy bog‘liqligini ta’minlash;
- talaba-yoshlar ta’lim-tarbiyasi uchun qo‘shimcha sharoitlar yaratishga qaratilgan kompleks chora-tadbirlarni o‘z ichiga olgan beshta tashabbusni amaliyotga tatbiq etish
belgilangan.
Yangi institutda o‘qish 2020/2021 o‘quv yilidan boshlanishi kutilmoqda. Oliygoh Nukus shahrining Do‘snazarov ko‘chasidagi 104 va 108-uylarga joylashtiriladi. 2021-yildan esa institut talabalari uchun 300 o‘rinli yotoqxona qurilishi boshlanadi.
