“Toshkent” xalqaro aeroportida bojxonachilar tomonidan iPhone 11 telefonlari va boshqa tovarlarning yashirin yo‘llar bilan olib kirish holati aniqlandi, deb xabar bermoqda Bojxona qo‘mitasi matbuot xizmati.

Foto: Bojxona qo‘mitasi matbuot xizmati

Qayd etilishicha, xorijdan uchib kelgan fuqaro M.A. oldindan kuzatuvga olingan va avtoturargohdagi Spark mashinasi yonida noqonuniy yo‘llar bilan olib kirilgan telefonlarni yig‘ib olayotgan vaqtida tezkor guruh xodimlari tomonidan ashyoviy dalillar bilan qo‘lga olindi.

Ushbu shaxs tekshirilganida, uning avtomashinasidan umumiy qiymati 140 million 500 ming so‘mlik 11 dona iPhone 11, 17 dona atir va elektron qo‘l soatlari mavjudligi aniqlangan.

Hozirda yuqoridagi holat yuzasidan bojxona organlari tomonidan surishtiruv harakatlari davom ettirilmoqda.

Bundan avval Qoraqalpog‘istondagi “Daut-ata” chegara bojxona postida qadimiy tangalarni olib chiqib ketishga uringan shaxs, “Qoraqalpog‘iston” temir yo‘l chegara bojxona postidan 33 million so‘mlik viskilarni chegaradan yashirincha olib o‘tmoqchi bo‘lgan yo‘lovchi qo‘lga olingandi.

Tojikiston chegarasida joylashgan “Jartepa” chegara bojxona posti orqali esa 13,7 mln so‘mlik zargarlik buyumlarini oyoq kiyimida O‘zbekistonga olib o‘tmoqchi bo‘lgan shaxs to‘xtatib qolingan.