“O‘zmetkombinat” AJda ilgari xorijdan import qilingan mahsulot ishlab chiqarilmoqda

Joriy yilning 1-noyabr kuni O‘zbekiston Respublikasi Tashqi iqtisodiy faoliyat milliy banki tomonidan Toshkent viloyatining Bekobod shahri “O‘zmetkombinat” AJsiga OAV vakillari ishtirokida press tur tashkil etildi. Press turning asosiy maqsadi — O‘zbekistonda ilk bora ferrosilitsiy va ferrosilitsiymarganetsni ishlab chiqarish jarayoni bilan yaqindan tanishtirish.

2016-yil 28-dekabrdagi O‘zbekiston Respublikasi Vazirlar Mahkamasining 954-sonli farmoyishiga asosan O‘zbekiston Respublikasi Tashqi iqtisodiy faoliyat milliy banki Koreyaning eksport-import banki mablag‘lari sindikatini yaratish orqali “O‘zmetkombinat” AJda ferrosilitsiyni ishlab chiqarishni yo‘lga qo‘yish maqsadida moliyalashtiruvchi bank sifatida tanlab olindi.

Loyiha doirasida bir yilda 15 000 tonna ferrosilitsiy ishlab chiqarish ko‘zda tutilgan. Loyihaning umumiy hisobi 36 mln AQSh dollarini tashkil etadi. O‘zmilliybank Koreyaning Eksimbanki jalb qilgan sarmoyasi hisobidan 6,48 mln AQSh dollarini moliyalashtirilishi yo‘lga qo‘yildi. Kredit mablag‘lari to‘liq o‘zlashtirildi. Dastur doirasida yetkazib berilgan texnikalar o‘rnatildi va to‘liq jarayonda ish olib bormoqda.

Shu bilan birga, mutaxassislarni o‘qitish ham amalga oshirildi. Ferrosilitsiyni ishlab chiqarish obyekti 2018-yilning 30 avgustidan ekspulatatsiya tushirildi.

2017-yil 16-maydagi O‘zbekiston Respublikasi Prezidentining 4938-sonli qarori ijrosini ta’minlash maqsadida O‘zmilliybank Koreyaning Eksimbanki jalb qilgan sarmoyasi hisobidan 5,7 mln AQSh dollari ferrosilitsiymarganet ishlab chiqarishni moliyalashtirish uchun ajratildi.

Loyihaning umumiy summasi 23,8 mln dollarni tashkil etib, bir yilda 10,000 tonnani tashkil etishi ko‘zda tutilgan. 2018-yilning 7-dekabr kuni obyekt to‘liq ekspulatatsiyaga tushirildi. Kreditlar 1 yil imtiyoz bilan 5 yil muddatga ajratildi. Shuningdek, ikkala mahsulotni ishlab chiqarishda jami 290 ta yangi ish o‘rinlari yaratildi.

Ferrosilitsiy va ferrosilitsiymarganets qora metallga egiluvchanlik xususiyatini beruvchi mahsulotdir.

Prezidentimizning tashabbusi bilan o‘zimizda ishlab chiqarishni yo‘lga qo‘yilgan ushbu mahsulotga 10tadan ortiq xorij davlatlaridan buyurtmalar kelib tushmoqda. Ilgari ferrosilitsiy va ferrosilitsiymarganets xorijdan import qilingan.

Mutaxassilarning fikricha, har yili bu mahsulotni sotib olish uchun davlatimiz tomonidan 15 mln AQSh dollari sarflangan. Endilikda u nafaqat ichki bozorni qoplaydi, shuningdek eksport ham qilinadi.

Reklama huquqi asosida.