Ekvador prezidenti Lenin Moreno yonilg‘i savdosi sohasidagi o‘zgarishlar sabab boshlangan norozilik namoyishlari tufayli 3-oktabr, payshanba kuni mamlakatda favqulodda holat e’lon qildi. Bu haqda “Korrespondent” xabar berdi.

Foto: EFA

“Men fuqarolar xavfsizligi, tartibni saqlash va mamlakatda palapartishliklarni yuzaga keltirayotganlarga qarshi turish maqsadida favqulodda holat e’lon qilaman”, — deyiladi Ekvador prezidentining Twitter’da e’lon qilgan xabarida.

Shuningdek, u hukumat yolg‘on axborotlarga taslim bo‘lmoqchi emasligi, muhokamalarga tayyorligi va qonun doirasida ish yuritishini alohida ta’kidlagan.

Ekvadordagi noroziliklar Moreno 3-oktabrda dizel va benzin uchun subsidiyalarni bekor qilish haqidagi farmonni imzolaganidan keyin yonilg‘i narxi oshganligi uchun boshlangan.

Farmon e’lon qilingach mamlakatning bir nechta shahrida namoyishlar o‘tkazilishi boshlangan va ularda ishtirok etayotganlar o‘zgarishlarni bekor qilishni so‘ramoqda.

Mamlakatda har yili davlat tomonidan yonilg‘i uchun 1,3 milliard AQSh dollari miqdoridagi subsidiya taqdim etilardi.

Ekvadorga qo‘shni davlat Peruda ham vaziyat barqaror emas. Prezident va parlament o‘zaro murosa qila olmayapti.