Futbol bo‘yicha Italiya A Seriyasining 2-turidan o‘rin olgan markaziy uchrashuv Turindagi “Alyans Stedium” mezbonlik qiladi.
Unda amaldagi chempion “Yuventus” Karlo Anchelotti qo‘l ostidagi “Napoli” bilan bahsga kirishadi. Xo‘sh, turning markaziy uchrashuvi haqida bizga nimalar ma’lum? Bugungi bahs haqiqiy futbol spektaklini muxlislarga taqdim eta oladimi?
“Yuventus”
“Yuventus” yangi mavsumni yangi bosh murabbiy — Mauritsio Sarri qo‘l ostida g‘alaba bilan boshladi. Turinliklar ilk turda “Parma” mehmoni bo‘lib, jamoa sardori Jorjio Kyellini tomonidan urilgan yagona gol evaziga uch ochkoni qo‘lga kiritdi. Ne baxtki, Sarri bosh murabbiyga aylangan bo‘lsa-da, o‘tgan bahsdagi kabi hozirda u jamoa o‘yinini tribunadan kuzatishga majbur. Italiyalik mutaxassis zotiljam kasalligi bilan og‘rigani ma’lum bo‘ldi. U hozircha zaxira o‘rindig‘ida ko‘rinish bermaydi. Bundan tashqari o‘tgan o‘yindagi g‘alaba goli muallifi Kyellini ham jarohatga yo‘liqdi. Futbolchi tizzasidan og‘ir jarohat olgan va u tez orada jarrohlik amaliyotini boshdan o‘tkazishi kutilmoqda. Jamoa sardorining o‘rnini kattagina mablag‘ evaziga sotib olingan Matteys de Ligt bildirmaslikka harakat qilishi tabiiy. Qayd etish joiz, niderlandiyalik himoyachi 1-turda zaxirada qoldirilgandi. O‘tgan o‘yinda VAR tufayli goli hisobga olinmagan Krishtianu Ronaldu esa sobiq ustozi Anchelottining jamoasiga qarshi ikki hissa kuch bilan harakat qilishiga shubha yo‘q. Umuman olganda, Turin klubi tarkibida yo‘qotishlar o‘rnini bildirmaydigan kadrlar yetarlicha topiladi. Shunday ekan, klub muxlislari xavotir olmasa ham bo‘ladi.“Napoli”
Karlo ota shogirdlari ham yangi mavsumni g‘alaba bilan boshladi. Ammo klub ilk turdayoq qattiq ter to‘kishiga to‘g‘ri keldi. Florensiyadagi bahsda muxlislar naq 7 ta golning guvohi bo‘ldi. “Napoli” “Fiorentina”ga qarshi bahsda 4:3 hisobidagi g‘alabani tantana qildi. Shu kuni neapolliklarning hujum triosi: Mertens—Kalyexon—Insinye jamoasining joniga oro kirdi. Anchelotti jamoasida sezilarli yo‘qotishlar yo‘q. Himoya qo‘rg‘oni Kalidu Kulibali hamda “Roma”dan xarid qilingan Kostas Manolasga ishonib topshirilishi haqiqatga 99 foiz yaqin. Maydon markazida esa braziliyalik Allan va Pyotr Zyelinski kurashga shay bo‘lib turibdi. Neapollik muxlislar hujum uchligidan xavotir olmasa ham bo‘ladi. “Napoli” turinliklarga qarshi bahsda faqatgina yaqinda jarohatga yo‘liqqan markaziy hujumchi Arkadiush Milikning xizmatlaridan foydalana olmaydi.Taxminiy tarkiblar
“Yuventus”: Shesni — De Shilyo, De Ligt, Bonuchchi, Aleks Sandro — Rabio, Pyanich, Xedira — Ronaldu, Iguain, Kosta
“Napoli”: Meret — Di Lorenso, Manolas, Kulibali, G‘ulom — Allan, Zyelinski, Ruis — Kalyexon, Insinye, Mertens
Qiziqarli faktlar
- “Yuventus”ning A Seriya doirasida o‘z maydonidagi mag‘lubiyatsiz o‘yinlari seriyasi 21 taga yetdi
- A Seriya doirasidagi so‘nggi 6 ta o‘yinda “Napoli” kamida 2 tadan gol urmoqda.
- Jamoalar shu vaqtga qadar barcha musobaqalar doirasida 161 marta o‘zaro to‘qnash kelgan
- Shulardan 75 tasida “Yuventus” g‘alaba qozongan, 35 ta o‘yinda esa “Napoli”ning qo‘li baland kelgan. 51 ta bellashuvda esa tomonlar durangga rozi bo‘lgan.
- To‘plar nisbati “Yuventus” foydasiga 242-180
- Tomonlar o‘rtasidagi eng yirik hisobdagi durang: 3:2
- Tomonlar o‘rtasidagi eng yirik hisoblar: 3:5, 2:6, 5:3
- “Yuventus”ning “Napoli” ustidan eng yirik g‘alabalari: 6:2, 4:0
- “Napoli”ning “Yuventus” ustidan qozongan eng yirik g‘alabasi: 5:1.
- O‘tgan mavsum A Seriya doirasida “Yuventus” neapolliklarni o‘z maydonida 3:1, safarda esa 2:1 hisobida mag‘lub etgan.
A Seriya
2-tur bahsi
31-avgust, shanba
“Yuventus”—“Napoli” 23:45
Bosh hakam: Daniele OrsatoYanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Izoh (0)