Energetika vaziri MAGATE bosh direktori o‘rinbosari Mixail Chudakov bilan uchrashdi
19-avgust kuni O‘zbekiston Respublikasi Energetika vazirligida Energetika vaziri Alisher Sultonov va Atom energetikasi bo‘yicha xalqaro agentlik (MAGATE) bosh direktori o‘rinbosari — Yadro energetikasi bo‘yicha departament rahbari Mixail Chudakov o‘rtasida uchrashuv bo‘lib o‘tdi. Bu haqda Energetika vazirligi axborot xizmati xabar berdi.
Uchrashuv Atom energetikasi bo‘yicha xalqaro agentlikning Mixail Chudakov rahbarligidagi delegatsiyasi O‘zbekistonga rasmiy safari doirasida o‘tkazildi.
Ushbu tashrif muhim sana — O‘zbekiston Respublikasi va MAGATE o‘rtasida hamkorlik munosabatlari o‘rnatilganining 25 yilligi sharafiga tadbirlarni o‘tkazishga bag‘ishlangan.
Muloqot davomida Alisher Sultonov va Mixail Chudakov O‘zbekiston va MAGATE munosabatlarining bugungi holati va rivojlantirish masalalarini muhokama qilib, ushbu hamkorlik chorak asrdan buyon davom etib kelayotgani va mamlakatda birinchi atom elektr stansiyasini qurish loyihasi amalga oshirilishi munosabati bilan sifat jihatdan yangi bosqichga ko‘tarilganini ta’kidladi.
Ta’kidlaganidek, O‘zbekiston endilikda atomdan tinch maqsadda foydalanuvchi mamlakatlar safidan joy olgan bo‘lib, mazkur soha uchun yuqori malakali kadrlar tayyorlashga alohida e’tibor qaratishi lozim bo‘ladi.
Toshkent shahrida Milliy yadro tadqiqoti universiteti “Moskva muhandislik-fizika instituti”ning (NIYaU MIFI) filiali tashkil etilgan va faoliyatini boshlash arafasida bo‘lib, ilk talabalarni saralab olish muvaffaqiyatli o‘tkazildi.
Ayni vaqtda o‘zbekistonlik 60 nafar talaba Rossiyada mazkur oliy o‘quv yurtining o‘zida ta’lim olmoqda.
Bundan tashqari, 2019/2020-o‘quv yilida o‘zbekistonliklar uchun NIYaU MIFIning magistratura bosqichida ta’lim olish kvotasi ikki martaga oshirilib, 30 o‘rinni tashkil etdi.
Mamlakat soha uchun nafaqat yuqori malakali mutaxassislar tayyorlash, shuning bilan birga, aholi, xususan, bolalar va yoshlarni atomdan zamonaviy usullardan, yuqori darajadagi xavfsizlik ta’minlangan texnologiyalarni qo‘llagan holda foydalanilishini ham tushuntirib bormoqda. Jumladan, bu borada Toshkent shahrida O‘zbekiston Respublikasining atom texnologiyalari axborot markazi faoliyat ko‘rsatyapti.
Tashrif doirasida MAGATE rahbariyati a’zosi Mixail Chudakov va Energetika vazirining birinchi o‘rinbosari — “O‘zatom” agentligi bosh direktori Jo‘rabek Mirzamahmudov o‘rtasida ham uchrashuv bo‘lib o‘tdi.
Muloqotda qayd etilganidek, AES qurilishi loyihasini amalga oshirishda xavfsizlik masalasi O‘zbekiston uchun ustuvor ahamiyat kasb etadi. Shu boisdan bu borada sohadagi xalqaro tajriba va standartlar faol o‘rganilmoqda, jumladan, MAGATE mutaxassislarining bilimlaridan ham foydalanilyapti.
Hamkorlik doirasida MAGATE ekspertlari ishtirokida qator tadbirlar o‘tkazish rejalashtirilgan va amalga oshirilmoqda. Xususan, hozirgi vaqtda 2020-yilda INIR yadro infrastrukturasining kompleks sharhiga bag‘ishlangan missiyani o‘tkazishga tayyorgarlik ko‘rilyapti. Bu borada MAGATEga O‘zbekiston tomonidan yadro energetika dasturini rivojlantirish holatiga baho berish maqsadida so‘rov yuborilgan.
