Qozog‘istonda haj safari xarajatlari 600 dollarga qimmatladi
O‘tgan yili qozog‘istonliklarning haj safariga harajatlari 4200 dollarni tashkil etgan bo‘lsa, joriy yilda 3200 nafar ziyoratchi haj amallarini bajarish uchun 4800 AQSh dollarini to‘lashiga to‘g‘ri kelmoqda.
Qozog‘iston bosh muftiysi Serikbay hoji Oraz bu yilgi haj narxlarining oshishini izohlab berdi. Uning aytishicha, bo‘lajak hojilarga xizmat ko‘rsatadigan turkompaniyalar ularning har biridan o‘z xizmatlari uchun taxminan 50 ming tangadan olishadi.
“Turkompaniyalar uchta paket: Standart/ekonom, Komfort/lyuks va VIP paketlari bo‘yicha xizmatlarni taklif etadi. Tanlangan paketga qarab, hajning narxi belgilanadi. Qolgan barcha harajatlar haj safariga borganlarning aviaqatnovlari, Saudiya Arabistonida ko‘rsatiladigan transport xizmatlari, zamonaviy, barcha qulayliklarga ega mehmonxonalarga joylashtirish, ovqatlanish, ziyoratgohlarga ekskursiya uyushtirish, haj amallarini bajarishga yordam berishlariga sarflanadi.
Avvallari Saudiya Arabistoni Standart/ekonom paketi bo‘yicha borganlardan pul olmasdi, endi esa ulardan ham 300 dollardan olmoqda. Oxirgi yillarda Nur-Sulton, Olmaota, Chimkent va Oqtov shaharlaridan Saudiya Arabistoniga to‘g‘ridan-to‘g‘ri aviaqatnovlar yo‘lga qo‘yildi. Oldinlari fuqarolarimiz hajga Istanbul, Sharja, Dubay orqali borar, bu ko‘p vaqt olar va asablanishlarga sabab bo‘lar edi.
Bizning ziyoratchilarimizga xizmat ko‘rsatadigan Saudiya aviakompaniyasi ularni olib ketish uchun bo‘sh uchib keladi. Bu ham narxga ta’sir qiladi”, — deydi bosh muftiy.
Uning bildirishicha, bundan tashqari, Saudiya Arabistonidagi transport xarajatlarining narxi uch marotabaga ko‘tarildi, shunga yarasha xizmat sifati ham oshdi.
“Qo‘shni mamlakat fuqarolari uchun haj safarlari arzon tushayapti, degan gaplarga xizmat ko‘rsatishning sifati nuqtai nazaridan baho berish kerak. Qirg‘izistonlik ziyoratchilar 90-yillardan beri Saudiya xayriya jamg‘armalari hisobidan bepul mehmonxonalar bilan ta’minlanadi. Ammo ushbu mehmonxonalar Makkadagi al-Haram masjididan ancha uzoqda joylashgan. Bu esa ushbu masjidga ziyoratchilarning yetib kelishi uchun ancha qiyinchilik tug‘diradi. O‘zbekistondagi haj xarajatlari esa biznikidan unchalik katta farq qilmaydi”, — o‘z so‘zini yakunladi Serikbay hoji Oraz.
