AQShning yadro qurollari joylashtirilgan maxfiy joylar ro‘yxati tasodifan NATO hisobotiga tushib qoldi
NATO Parlament assambleyasi qo‘mitalaridan biriga mo‘ljallangan hisobotda mualliflardan biri adashib, Yevropada AQShning yadro qurollarini joylashtirish mo‘ljallangan joylar ro‘yxatini kiritdi. Bu haqda Belgiya OAVlari qo‘liga tushgan hujjatga tayanib, The Washington Post xabar bermoqda.
Unda aytilishicha, yaqinda nashr etilgan va keyinchalik olib tashlangan NATOga tegishli tuzilma tomonidan chop etilgan hujjat “Yevropa matbuotida shov-shuvga sabab bo‘lib, anchadan beri ko‘pchilikka ma’lum bo‘lgan sir: AQShning yadro qurollari Belgiya, Germaniya, Italiya, Niderlandiya va Turkiyada saqlanayotgani o‘z tasdig‘ini topgan.
“TASS”ning yozishicha, bu ma’lumotlarni o‘z ichiga olgan hujjat aprel oyida tayyorlangan bo‘lib, Bratislavada o‘tkazilgan NATO Parlament assambleyasining bahorgi sessiyasiga mo‘ljallangan. Belgiyaning De Morgen gazetasi tomonidan keltirilgan parchaga ko‘ra, matnda Yevropada 150 ta yadro kallaklari tarqatilgani tilga olingan. Bu bombalar 6 ta Amerika va Yevropa bazalarida saqlanmoqda.
Biroq nashrda keltirilishicha, o‘tgan haftada internetda hujjatning yangi versiyasi joylangan bo‘lib, unda yadro qurollari tarqatilgan joylar haqidagi ma’lumot olib tashlangan.
Ma’ruza muallifi, kanadalik senator Jozef Deyning The Washington Post’ga birinchi versiya shunchaki qoralama variant bo‘lganini ma’lum qilgan. “Ushbu ma’ruzada keltirilgan barcha ma’lumotlar hamma uchun ochiqdir”, — deb ta’kidlagan u, biroq hech qanday manbaga havola berilmagan.
