Yunusobod tumani hokimligi uysiz ayolga bir yil avval sovg‘a qilingan xonadonni qaytarib berishni talab qildi

Bundan bir yil avval 14 yil davomida ijara xonadonlarda, podyezdlarda, parklarda yashab yurishga majbur bo‘lgan toshkentlik ayol Nargiza Shomurodovaga Yunusobod tumanida ikki xonali xonadon kaliti topshirilgan edi.

Ammo oradan bir yil vaqt o‘tib, yangilangan tarkibdagi tuman hokimligi turar joyni qaytarib berishni talab qildi, evaziga yangi uy uchun ipoteka kreditini olishni taklif etdi, deb xabar beradi “Nuz.uz”.

Nargiza Shomurodovaning ma’lum qilishicha, uyni berish paytida tuman hokimligi ayol va uning ikki o‘g‘lini 2—3 hafta ichida yangi xonadonga ro‘yxatga qo‘yishga va’da bergan. Uyning o‘zini rasmiylashtirish esa yarim yildan bir yilgacha vaqt olishi mumkinligi, avval egasiz xonadon hokimlik balansiga o‘tkazilishi, so‘ng ma’lum davr o‘tgach, u yangi egasi nomiga rasmiylashtirilishi aytilgan. Ammo na rasmiylashtiruv, na ro‘yxatga qo‘yish amalga oshgan.

Ayol Xalq qabulxonasiga murojaat qilgan. U yerda unga ushbu xonadonni shunchaki hadya qila olmasliklarini, chunki u hamon hokimlik balansida emasligini aytishgan, qachon balansga o‘tishi esa noma’lum. Xalq qabulxonasi vakili Nargiza Shomurodovaga bu turar joy vaqtinchalik berilganligini ta’kidlagan.

“Endi men yana parkka qaytib, o‘sha yerda yashashim kerakmi? Bularning hammasi xo‘jako‘rsingamidi?” — deydi ayol.