Andijon shahri va Xo‘jaobod tumanida “Namunali hudud” tajribasini yaratish, shuningdek fuqarolarning xavfsizligi va osoyishtaligini ta’minlash maqsadida ichki ishlar xodimlari tomonidan shahar va tumanlarda “Tig‘” profilaktik tadbirlari o‘tkazilmoqda. Bu haqda “Daryo”ga viloyat IIB matbuot xizmati xabar bermoqda.
Viloyat IIB matbuot xizmatining yozishicha, turli tig‘li buyumlar olib qo‘yilishi o‘z navbatida tan jarohati bilan bog‘liq jinoyatlarning oldi olinishiga xizmat qilmoqda.
Ushbu tadbir doirasida 1—20-iyun kunlari fuqarolardan Andijon shahrida xizmat olib boruvchi profilaktika inspektorlari tomonidan 94 ta, IIB Patrul-post xizmati xodimlari tomonidan esa 71 ta o‘tkir tig‘li predmet olingan.
“Bemaqsad yonida o‘tkir tig‘li jismlar ko‘tarib yurgan shaxslar bilan profilaktik suhbatlar o‘tkazilib, shu kunning o‘zida ularning ota-onalari va keng jamoatchilik ishtirokida muhokama yig‘ilishlari o‘tkazilgan. Yoshlarning o‘tkir tig‘li jismlarni yonida olib yurishlari ularning ojizligini ko‘rsatishi, buning oqibati esa ayanchli holatlar bilan yakunlanishi mumkinligi ta’sirchan usullarda keng jamoatchilikka tushuntirib borilmoqda”, — deyiladi viloyat IIB matbuot xizmati xabarida.
Izoh (0)